David Rubín fai as Italias

A editorial italiana Tunué lanza a vindeira semana o álbum David Rubín, centrado neste autor ourensán de BD. O volume de 48 páxinas recolle unha ampla entrevista e mostras do traballo deste creador en ilustración e banda deseñada, así como exemplos do seu proceso creativo. Para presentar a obra, Rubín fará unha xira por Italia. Entre os días 5 e 7 participará no festival Fullcómics, que lle dedica unha exposición composta por máis de 50 orixinais. Na mesma viaxe, o debuxante visitará Latina, en Roma, e mais Florencia, onde desenvolverá presentacións da obra. Entre os seus vindeiros proxectos, Rubín adianta que publicará unha BD, con guión de Kike Benlloch sobre o poeta Uxío Novoneyra, homenaxeado no Día das Letras deste ano.