Arquitectos do contorno

Hoxe, co gallo do Día Mundial da Arquitectura, os profesionais deste campo pretenden lanzar unha mensaxe á cidadanía: a vivenda debe estar relacionada co seu contorno. Por iso, o COAG aproveita este efeméride para reflexionar sobre a relación entre os espazos construídos e os seus contornos.

“O dinamismo do arquitectos fronte ás crises globais”. Este é o lema co que o Consello Superior dos Colexios de Arquitectos de España (CSCAE) e a Unión Internacional de Arquitectos (UIA) convocaron a unha reflexión a propósito do seu día mundial. Unha celebración na que, alén de visibilizar o seu papel, pretenden concienciar a sociedade da necesidade de ter unhas construcións que avoguen polas dinámicas da sostibilidade e a inclusión social. Aquí, cada delegación do COAG (son sete, unha por cada cidade de Galicia) elixiu un espazo público para dar a coñecer a importancia da arquitectura.

Sete espazos, sete exemplos
Cada espazos reflexiona sobre un exemplo do seu contorno máis próximo para poder achegar ese valor de sustentabilidade e racionalidade arquitectónica que o COAG pretende dar a coñecer.

A Coruña
A delegación do COAG da Coruña acollerá unha exposición e dous coloquios (un deles terá lugar a mediodía polo que o Colexio repartirá bocadillos entre os asistentes) para reflexionar sobre os “espazos públicos engadidos”, ou o que é o mesmo, os lugares construídos ao lado das cidades. Malia que hoxe é o día no que se celebra a efeméride, as actividades desenvólvense ata o 14 de outubro, data na que se presenta a Plataforma de Reflexión e Pensamento “A Cidade dos barrios” que pretende ofrecer unha lectura paralela sobre a cidade da Coruña.

Ferrol
A visita ao mosteiro de Caaveiro é o prato forte das actividades previstas pola delegación de Ferrol. O obxectivo é dar a coñecer a recente rehabilitación, como unha mostra de achegamento entre a construción e a paisaxe do seu contorno. Celestino García Braña, decano do COAG, é o encargado de explicar as características do proxecto de rehabilitación.

Lugo
A delegación de Lugo opta por un programa dedicado a profesionais para celebrar este día. Por iso, nos meses de outubro e novembro acollerá as primeiras “Xornadas de Arquitectura e Hermenéutica”.Unhas sesións nas que arquitectos e filósofos recoñecidos abordarán conceptos como a estética, a ética e a hermenéutica aplicada ao caso construtivo.

Ourense
Foi un proceso lento e continuado pero hoxe, o casco histórico de Ourense estrea nova imaxe grazas a unha fonda remodelación. Un exemplo de sustentabilidade que a delegación do COAG nesta cidade pretende dar a coñecer nun día como o de hoxe. A elección dos materiais, as axudas desenvolvidas e as directrices marcadas polo COAG foron determinantes para a súa configuración actual. Por iso, a delegación ourensá colocará hoxe unha praca conmemorativa dese traballo na praza da Ferraría (as 19:00 horas).

Pontevedra
Alfonso Penela foi o arquitecto encargado de deseñar o Centro de Tecnificación e a Escola Municipal de Vela en Vilagarcía. Por iso, será o encargado de presentar hoxe as características deste edificio ao público, elixido como exemplo no Día Mundial da Arquitectura. Ao tempo, a delegación pontevedresa, en colaboración co CineCube Pontevedra e a Fundación Caja de Arquitectos, desenvolverá un ciclo de documentais de arquitectura ao longo deste mes de outubro que está centrado na obra dalgúns dos arquitectos máis recoñecidos do mundo (Gaudi, Siza, Walter Gropius, Otto Wagner, Le Corbusier, Santiago Calatrava…)

Santiago
A delegación de Santiago do COAG celebra deste Día Mundial da Arquitectura cunha instalación (a inauguración terá lugar ás 20:00 horas) que pretende reivindicar o papel dos oficios tradicionais. Para iso, colocará pequena vide de cobre reciclado que medrará dun piar da Casa da Conga, que contará con fíos de luz que tentarán acadar a fachada da catedral. Un traballo que leva o nome de Unha nova man e que foi feito por un ferreiro e un orfebre de Santiago, dúas das profesións sobre as que os arquitectos quixeron homenaxear.

Vigo
A delegación de Vigo estrea nova sede e aproveita este día para abrila ao público. Ademais, acollerá a exposición Unha Viaxe por ….1929-2009. Un traballo feito por Pablo Gallego que serve para reflexionar sobre a paisaxe e a evolución do territorio a partir de Unha viaxe por Galicia, o primeiro documental subvencionado pola administración hai oitenta anos.

Delegación de Ferrol do COAG

As fragas do Eume e o seu contorno centran a programación do "Día Mundial da Arquitectura da sede ferrolá do COAG

Centro de Tecnificación e Escola Municipa de Vela

Edificio proxectado por Alfonso Penela

Centro de Tecnificación e Escola Municipa de Vela

Alfonso Penela, o arquitecto encargado do seu deseño, explicará hoxe o proxecto no marco das actividades da delegación pontevedresa do COAG. O eficio está construído en Vilagarcía.

Día Mundial da Arquitectura

Parte da instalación "Unha nova man" encargada pola Delegación de Santiago do COAG para celebrar o Día Mundial da Arquitectura

Unha nova man

A instalación, que se inaugura hoxe luns ás 20:00 horas, pretende reproducir unha vide en cobre e luz na Praza da Quintana.

Sede da Delegación do COAG en Vigo

Cartel da proposta da Coruña do COAG