Os conflictos sociais centran a VII edición do Festival de Cine Euroárabe Amal

Naceu coa necesidade de aproximar ao público a realidade social e cultural do mundo árabe, e agora é unha das referencias desta temática en toda a península. Amal celebra este ano a sétima edición que se presenta como a máis completa (polo número de actividades complementarias) e a máis social (en canto á temática). En total haberá 36 películas a competición que segundo Eduardo Galán, membro do xurado, “son películas que falan dos sentimentos, das emoción, son virulantemente comprometidas pero non violentas, tendo en conta no contexto de violencia xeral na que se ambientan”. Nesta liña, o director do festival, Ghaleb Jaber, explicou que moitos dos títulos que se proxectan tiveron qeu saír do seu país de forma clandestina.

Un ciclo didáctico de cine árabe para nenos, un programa monográfico sobre os inicios do cine exipcio dos anos 30 (que se emitirán nas sedes da Fundación Caixa Galicia), as tradicionais xornadas sobre gastronomía árabe, o concerto de Faiçal Salhi ou a exposición sobre pintura árabe que se poderá visitar na Fundación Araguaney, conforman a estrutura dun festival que se artella arredor da sección competitiva.

Amal Express
Entre as novidades deste ano destaca o concurso de curtametraxes na rede, Amal Express. Unha sección na que creadores de todo o mundo deberán facer unha curtametraxe inferior a cinco minutos no prazo máximo de 96 horas. Ao inicio do encontro, os organizadores facilitaranlle aos inscritos unha palabra sobre a que ha de versar a curtametraxe que deberá subirse ao portal www.zappinternet.com.