Resumir 90 anos de intensa historia musical non é sinxelo. Ata o vindeiro 27 de setembro no Edificio Simeón de Ourense podemos ver un exemplo de como abordar este traballo. Da man da discográfica Ouvirmos a exposición Sete voces para a Coral De Ruada achéganos á historia desta histórica formación da música tradicional galega.
Sete voces para a coral De Ruada estrutura noutros tantos ámbitos a historia do grupo, Palabra, Movemento, Innovación, Galeguismo, Talento, Momentos e Legado. Deste xeito explóranse os vencellos culturais e artísticos do conxunto, as xiras internacionais ou a herdanza que deixou o coro desde a súa fundación ata a actualidade. Nada en 1919, a Coral de Ruada chegou cos anos a ser unha das principais formacións deste tipo que existen no país, e unha das poucas que se manteñen en activo logo de tanto tempo.
Arquivos propios
A existencia dun importante arquivo con fondos históricos, facilitou a escolma de material para a exposición que conmemora os 90 anos do traballo deste grupo a prol da nosa música tradicional. “O fin primordial da exposición é visualizar o traballo da coral durante noventa anos, entón todos os fondos son propios”, explica desde Ouvirmos José Manuel Aldea, que salienta a importancia do arquivo que a formación foi acumulando desde o primeiro momento. “Queremos destacar o labor de todos os membros da coral. Xa desde o comezo nos libros e nos arquivos se recolleu polo miúdo a actividade do grupo”. Deste xeito, fotografías históricas de formacións e de actuacións do grupo puidéronse combinar con capas de discos, carteis e outros elementos para conformar esta mostra. De entre as pezas que se conservan e que se poden ver na mostra, “eu destacaría a bandeira orixinal de Camilo Díaz Baliño, penso que de 1921, e tamén os bosquexos deste artista para os decorados”.
Vangardas tradicionais
Canda á bandeira, a mostra revela a importante relación deste artista plástico coa coral. Debuxos, cadros e reprodución dos decorados que realizara para o grupo amosan que a importancia deste conxunto trascende a música senón tamén para a pintura. Do mesmo xeito, no Edificio Simeón poderemos coñecer a longa relación de De Ruada co cinema, que se remonta a 1925 co filme La Virgen del Cristal e que continuaría con aparicións en títulos coma Carmiña, Flor de Galicia ou O Carro e o Home. E é que, segundo explica o texto da mostra, o proxecto inseríase “ no movemento vangardista de recuperación da cultura”. Nesa liña de modernidade, foi o primeiro grupo do seu tipo en contar cun mulleres e tamén foi pioneiro en desenvolver unha iniciativa empresarial vencellada coa música tradicional, “unha xira por varios teatros de Galicia apadriñada polo empresario Isaac Fraga”.
Multimedia
Para alén de paneis, debuxos e fotografías, a mostra recupera condecoracións, bandeiras e outros elementos. Do mesmo xeito, un audiovisual recolle as palabras dos actuais membros da formación e compila escenas de diferentes filmes nos que participou o grupo. Como non podía ser doutro xeito, Ouvirmos recuperou tamén algúns dos primeiros temas gravados polo conxunto, que se distribuirán de xeito masivo a coincidir coa mostra.
