As vendas de libros descen un 6 por cento

As vendas de libros desceron a nivel estatal un 6% en 2008 a respecto do ano anterior. Ao tempo, as exportacións diminuíron un 10%, segundo os datos que fixo públicos a Federación de Gremios de Editores, que inclúe as empresas galegas neste campo. Ao tempo, segundo publica La Voz de Galicia no noso país a novela desprazou a literatura infantil en canto a títulos máis vendidos. Máis concretamente, na consulta aos libreiros que fai este xornal, revélase que a obra A praia dos afogados de Domingo Villar é a obra con maior éxito na actualidade. Pola súa banda o Observatorio da Cultura Galega detectou un incremento destacado no número de títulos que se publicaron en todo o estado no primeiro trimestre de 2009, xa que neses meses saíron á luz 25.708 títulos a nível estatal fronte aos 21.755 do mesmo período no ano anterior, segundo os datos do ISBN.