Cultura licita o concurso da exposición do Parque Arqueolóxico de Arte Rupestre

Deseño da exposición permanente, sinalización e roteiros de todo o Parque Arqueolóxico, elaboración de audioguías, folletos e guías de visita son os contidos que acaba de encargar a Consellaría de Cultura. O DOG publicaba esta semana a licitación do contrato por importe de 2,2 millóns de euros que pretende ilustrar e dar a coñecer ao público os petróglifos galegos e o contexto histórico e ambiental no que se asentan. Para iso, o Servizo de Arqueoloxía da Consellaría estableceu un documento que orienta as empresas que se queiran presentar sobre o tipo de museografía a acadar.