MOA pretende achegar unha cara diferente da artesanía de Galicia

A Artesanía de Galicia quere romper cos tópicos e exhibir o seu potencial. Faino no marco de MOA (Mostra de Artesanía de Galicia), a primeira feira do sector na que amosarán que a artesanía é moito máis que o encaixe, a construción de pandeiretas ou a olaría. Desde escenografías teatrais, ata xoias en vidro, lámpadas de deseño, cadros confeccionados con tule e gancho así como pezas de parede de gres fan parte desta feira que terá 83 expositores. Canda a este, haberá un nutrido programa cultural que arrinca esta noite coa compañía Nova Galega de Danza e que inclúe outros nomes como Nordestinas, Susana Seivane ou Bonovo. O encontro terá lugar ata o 1 de marzo na Coruña.