Unha feira que chega para quedarse

É máis pequena, máis modesta pero tamén máis recente.Con só tres edicións ás súas costas ART Madrid é a segunda feira de arte contemporáneo do estado, e perfílase como un proxecto que chega para quedarse. Nas mesmas datas, na mesma cidade que ARCO e aproveitando o tirón da feira, chega esta cita na que hai nutrida representación galega. Descóbrea a partir de mañá no especial ART Madrid de culturagalega.org.

A arte contemporánea ten unha cita estes días en Madrid. ARCO e ART Madrid son os dous eventos que converterán a capital española no epicentro da arte contemporánea e ambas citas, malia estar ben diferenciadas teñen puntos de conexión. Ademais dos da coincidencia na temática, datas e cidade, Art Madrid abrirá as súas portas mañá no Pavillón de Cristal da casa de Campo de Madrid, curiosamente o mesmo escenario no que ARCO iniciou o seu despegamento e a súa importancia.

As cifras
Na cuarta edición que terá lugar ata o vindeiro luns haberá 75 galerías participantes escollida por un comité que opta pola presenza española. 61 delas chegan de 15 Comunidades Autónomas (o que supón o 82% do total) mentres que o resto chega de Alemaña, Arxentina, Brasil, Colombia, Cuba, Holanda e Portugal. Ademais, con respecto a edicións anteriores, o comité de selección foi máis estrito á hora de escoller galerías con obra da vangarda histórica que pasaron a reducise case á metade.

550 artistas que van desde clásicos como Picasso, Mirón, Le Corbusier, ata contemporáneos como Barceló Gordillo, Chillida Botero pasando por Warhol ou Wilfredo Lam.

Na súa liña habitual, Young Art e Art Show pemiritrá achegar a arte emerxente máis nova, que van desde a obra realizada nos últimos anos ou a obra de artistas menores de corenta anos.

Cunhas datas moito máis flexibles (do 6 de febreiro ao 15 de marzo) e dentro dese interese de Art Madrid por prestar atención a arte latinoamericana, un total de 14 artistas achegarán na Casa de América os temas máis recorrentes na cultura latina. Non se trata dunha análise xeracional, senón de exhibir como se emprega na memoria no proceso creativo e busca unha identidade ou esencia común da cultura iberoamericana como resposta á globalización da social. A pegada do íntimo ou a experiencia persoal, O contorno ou a memoria social, O círculo vital.Tempos de infancia, dor e morte son algúns dos epígrafes baixo os que se agrupará esta exposición.

A presenza galega
“Despois de 23 anos ininterrompida en ARCO unha serie de motivos entre os que están os criterios de selección, o rumbo que estaba a tomar a feira e o trato que recibiu Trinta no 2008 obrigándoa a participar nunha sección que distaba moito da orientación da galería, decidimos non volver presentarnos. Pero iso non significaba quedarse en Galicia sen facer nada, senón buscar outras citas. Foi entón cando nos demos conta que existía en Madrid outra feira, moi interesante, e que nos escollía unicamente polo dosier que nós presentamos” explica Asunta Rodríguez, directora da Galería Trinta. O que podía pensarse nun enfado pueril ao rematar no 2008 tomou corpo e a galería foi poñendo os ollos nesta feira nova, desenfadada e moi atrevida. Trinta non presentou nin o dosier para asistir a ARCO (que si fixeron moitas outras que tamén amosaron o seu descontento xunto con Trinta o ano pasado) e foi traballando para Art Madrid. Tanto é así que afirma que “o espazo que presentamos é igual que se estivésemos en Basilea ou ARCO. Trinta mantense fiel á súa liña de identidade, e non cambiamos para agradar a ningún comité que decide que a internacionalizade é un criterio de calidade. De tal xeito que o espazo que levamos a ART Madrid non varía nin nos metros cadrados, nin no proxecto expositivo, nin nos artistas”. “Alá viaxamos coa sensación de que volvemos empezar pero non é o mesmo, porque xa levamos preto de 25 anos de experiencia” asegura Asunta Rodríguez.

O caso de Trinta é diferente ao do resto de galerías galegas que acoden a Madrid. O máis próximo é o de Marisa Marimón, que xa ten experiencia na asistencia a feiras porque, entre outras moitas citas, estivo presente varios anos en ARCO, antes do cambio de rumbo. Moret Art, como proxecto expositivo derivado dunha consultora de arte, asiste á feira para presentar, en palabras de Nuria Blanco, “a base do noso proxecto que pasa por achegar novas formas de expresión artísticas, así como xente de menos de corenta anos”. Para Nuria “o impacto de vendas é importante pero secundario porque no marco do noso traballo como consultora o que pretendemos é desenvolver as carreiras dos artistas e difundir a súa obra. É máis un investimento de futuro”. Polo demais, completa a presenza galega as galerías Metro ( as de Vigo e Santiago) cunha “proposta conxunta de arte galego cento por cento coa que pretendemos seguir contribuíndo á difusión e profesionalización dos artistas galegos. Para iso levamos obra recente de todos os artistas Caruncho, Manolo Moldes xunto con outros máis novos e que cobren diferentes soportes e linguaxes” explica Javier Blanco, responsable de ambas salas.