Corme estreará en xuño un museo de arte contemporánea

Non é habitual que unha localidade que de 1.200 habitantes conte cun museo de arte contemporánea. Menos aínda o proxecto responda a unha iniciativa privada e sexa auspiciado por unha fundación que organiza actividades que van desde bolsas de carácter internacional ata organizar óperas. Isto sucede en Corme, da man da Fundación Torre Pujales, nun proxecto comeza a ser moi popular.

Comezou coa afección ao mar do pintor Julio Pujales, que aterrou hai décadas en Corme para pasar os veráns. Trala súa repentina morte, a súa viúva (Cristina Torre) decidiu que fora ese lugar no que lle gustaba pasar as vacacións o que desenvolvera un proxecto que honrase a súa memoria e difundise o máis contemporáneo da creación artística. O resultado é a Fundación Torre Pujales que leva varios anos de andaina. Pero o seu proxecto estrela, a construción dun museo como sede das actividades, aínda está por chegar. Estes días estanse a completar as obras do centro que pretenden se inaugure en Corme en xuño deste ano.

As claves da Fundación
Había a concepción de que a pintura era algo única e exclusivamente para as clases elevadas, pero nós pretendíamos todo o contrario, que se popularice con actividades que permitisen romper esa cortina de fume que ten a creación contemporánea. Deste xeito, Óscar Rey, patrón da Fundación Torre Pujales pon enriba da mesa unha das claves desta entidade. Pero non é a única. Malia que Julio Pujales era pintor, a fundación que leva o seu nome pretende abranguer máis ámbitos que o puramente pictórico. Téndese a outro tipo de disciplinas dentro da arte contemporánea: ópera, música, cine, teatro, fotografía. Unha serie de actividades dentro do gran abano que permite a contemporaneidade asume Rey.

Mentres se ultiman as obras de construción do museo, que servirá de sede permanente dos seus fondos e lle permitirá ser máis ambiciosos, a fundación conta cun piso na propia localidade que sirve de acubillo de numerosas actividades. Entre todas as actividades que levan desenvolvendo destaca a convocatoria de bolsas de carácter internacional. A bolsa supón unha estadía dun mes en Corme, no que o artista ten liberdade total para o seu proceso creativo. O único que lle pedimos é que deixe unha obra á Fundación explica Óscar Rey. No tempo que leva traballando a fundación xa contou con máis dunha trintena de bolseiros. Con iniciativas como esta, é como vai medrando a colección da fundación. Contamos cunha colección propia, que é froito do traballo e interese de Julio Pujales puntualiza Rey. É dicir, a fundación almacena tanto as pinturas feitas polo propio Julio como a súa colección particular que inclúe obras desde Laxeiro ata Colmeiro. En todo caso, engade, hai numerosísimas obras tanto de pintores galegos como estranxeiros.

Un proxecto pensado para contorno
O padroado da Fundación Torre Pujales ten claro que a programación de actividades debe estar en consonancia directa co público ao que quere chegar. Por iso, os actos que organizan van desde conferencias sobre a paisaxe, algún artista galego ou concertos de música. O seu papel de dinamizador cultural a está a resultar moi destacado nesta localidade que non chega aos 1.200 habitantes. Por poñer un exemplo, no verán do 2008 organizaron o primeiro recital de ópera do lugar. Conseguiron a implicación da Igrexa que lles permitiu organizar o concerto no edificio parroquial que achegaron ao tenor Luís Díez Obregón, que ten compartido escenario con Plácido Domingo entre outras figuras internacionais, nun repertorio que incluía desde arias clásicas de ópera ata algunha zarzuela. O sorprendente é que conseguíu mobilizar a máis de 400 persoas.

Alén da música ou das artes plásticas, a Fundación non esquece a importancia que ten a olaría nesta zona. De feito, outro dos fins que persegue pasa pola participación activa dos oleiros a través dos artistas da Fundación. O seu cometido é lograr un laboratorio de formas, deseño e experimentación, que lle permita innovar xunto coa defensa dos modelos xa clásicos. Un obxectivo que poderá ser máis factible no momento no que conten co propio museo. Mentres tanto, na próxima Feria da Olería de Buño pretenden exhibir algún resultado dos realizados en colaboración coa pintora e escultora Carlota Cuesta e os oleiros de Buño.

¿Quen é Julio Pujales?
Julio Pujales era coruñés. Naceu no seu dunha familia que estivo moi vencellada ao mar desde sempre. Seu pai era armador e dous dos seus irmáns se dedicaron á pesca. Non é de estrañar entón, que o universo marítimo fose unha constante na obra de Julio Pujales. Na busca dunha maior profundidade e viveza das súas obras, Julio trasladouse a estudar Belas Artes a Valencia e, posteriomente, a Madrid, onde entrou na Academia de San Fernando da que chegou a ser académico. Non foi ata os setenta cando comezou a súa faceta expositiva. A morte sorprendeuno cando estaba despuntando na súa carreira polo que foi a súa viúva, Cristina Torre, a que decidiu continuar todo ese labor creando unha Fundación que preservase a súa memoria.