A mestura de materiais, cores e a composición a partir de diferentes volumes que pretende recoller o espírito da posguerra mundial é a idea na que se baseou a viguesa Isabel Mastache para a súa colección Sputnik. E o xurado, composto por deseñadores e responsables de centros de moda en Galicia como Jorge Galiñanes ou Dolores Dopico, valorou esta proposta facéndoa gañadora do Premio Tesoira. O premio consiste en 3.000 euros e unha bolsa de formación no ámbito da moda. O segundo premio (1.500 euros) foi para a cambadesa Eva Soto Conde por unha colección inspirada na tradición xaponesa e as construcións de papel. Completa o palmarés desta décimosétima edición do certame de novos creadores a pontevedresa Mónica Bastón cunha colección titulada A mente demente de Sévérine Sérizy. Ademais, estas creacións farán parte dunha exposición que se poderá ver os centros que El Corte Inglés ten en Galicia.
