Baixo o nome Fundación Pública Seminario de Estudos Galegos a Xunta creará unha institución na que preservará, entre outras cousas, o legado de Isaac Díaz Pardo. Así o anunciou o conselleiro de Presidencia, José Luis Méndez Romeu, en Rianxo despois de que o concello lle outorgara ao galeguista o título de fillo adoptivo. A fundación terá a súa sede no Instituto Galego da Información en San Marcos (Santiago) e comezará a funcionar antes de que remate o ano.
