As imprescindibles

Cineuropa arranca hoxe coa estrea de A noite que deixou de chover , unha película rodada en Santiago, ópera prima dun director compostelano e con Luis Tosar no elenco. Un aceno á produción galega nun festival que proxectará 250 títulos entre curtametraxes e longametraxes do mellor panorama cinematográfico internacional. Revisamos o programa co director de Cineuropa, José Luis Losa, para escoller as películas imprescindibles nesta edición número 22.

As produccións recomendadas por Jose Luis Losa, director do festival, son:
Gomorra de Matteo Garrone.
Sinopse: Poder, diñeiro e sangue: estes son os valores cos que os residentes da provincia de Nápoles e Caserta teñen que enfrontarse todos os días. Case nunca teñen a posibilidade de elixir, e case sempre son obrigados a obedecer as regras do sistema da Camorra.

Só uns poucos afortunados poden chegar a pensar en levar unha vida normal. Cinco historias entrelázanse neste escenario de violencia, nun cruel e aparentemente imaxinario mundo, pero que está profundamente arraigado na realidade.

My Winnipegde Guy Maddin.
Sinopse:A páxina web de My Winnipeg describe esta onírica película de Guy Maddin sobre a súa cidade natal como unha "docu-fantasia". Esta etiqueta axústase ao pé da letra á recreación, mediante imaxes de arquivo e unha narración fantasiosa, da vida e mais a historia dun dos lugares máis fríos de Canadá, no que uns cabalos que afogaron na neve se converteron no punto recorrente dos paseantes.

Cun imaxinario fascinante e un sentido do humor irónico (especialmente neste filme), Guy Maddin ganou un sitio privilexiado entre os cineastas de culto. My Winnipeg supón a enésima confirmación dun xenio.

Entre les Murs (A clase) de Laurent Cantet.
Sinopse:François (François Bégaudeau) e os demais profesores prepáranse para se enfrontaren a un novo curso nun instituto situado nun barrio conflitivo.

Cheos de boas intencións, desexosos de lles achegar a mellor educación aos seus alumnos, ármanse contra o desalento. Pero as culturas e as actitudes enfróntanse na aula, microcosmos da Francia contemporánea. Por moi divertidos e estimulantes que sexan os adolescentes, os seus comportamentos poden cortar de raíz o entusiasmo dun profesor que non cobra bastante. A tremenda franqueza de François sorprende os alumnos, pero o seu estrito sentido da ética cambalea cando os mozos empezan a non aceptar os seus métodos.

Waltz with Bashir (Valse con Bashir) de Ari Folman
Sinopse:Unha noite nun bar, un vello amigo cóntalle ao director Ari que ten una pesadelo recorrente no que o perseguen 26 cans. Cada noite o mesmo número de animais. Os dous homes chegan á conclusión de que ten que ver cunha misión que realizaron para o exército israelí durante a primeira guerra co Líbano a principios dos anos oitenta.

Ari sorpréndese ante o feito de que non lembre nada dese período da súa vida. Intrigado, decide ver e falar con vellos amigos e antigos compañeiros dispersados polo mundo adiante. Necesita saber a verdade acerca dese período e de si mesmo. Ari escaravella cada vez máis e os seus recordos empezan a reaparecer mediante imaxes surrealistas...

Blindness de Fernando Meirelles.
Sinopse:Unha curiosa epidemia de cegueira sacode un país. As primeiras vítimas deste accidente son encerradas nun hospital sen recibir explicacións nin apoio. Entre elas está unha muller que conserva a vista en segredo para poder acompañar o seu marido cego. No encerro vanse dar todo tipo de atrocidades mentres na rúa dominará o caos e mais o terror.

Aruitemo, Aruitemo (Still Walking) de Hirokazu Kore-eda.
Sinopse:A película transcorre nun día de verán no que uns fillos xa adultos visitan os seus pais anciáns, que viviron durante décadas na residencia familiar. O fillo e mais a filla volven, xunto coas respectivas familias, para unha reunión inusual co fin de conmemorar a tráxica morte do fillo maior, que afogou por mor dun accidente quince anos atrás.

Aínda que a casa e o menú da nai apenas variaron co paso dos anos, aprécianse lixeiros cambios en cada un dos membros da familia. Trátase da típica familia na que o amor ten que convivir cos resentimentos e mais os segredos.

Låt den rätte komma in (Let the right one in) de Tomas Alfredson.
Sinopse: Oskar, un tímido mozo de 12 anos, aterrorizado por uns matóns, faise amigo de Eli, unha misteriosa veciña, cuxa chegada coincide cunha serie de misteriosas mortes. A pesar de que o rapaz pensa que ela é un vampiro, intenta que a súa amizade estea por encima do seu medo.


Peeping Tom (O fotógrafo do pánico) de Michael Powell.
Sinopse:Mark Lewis, un cineasta compulsivo que vai por aí cunha cámara de cinema escondida debaixo do abrigo, aborda unha prostituta do barrio chinés londiniense. Xa no piso dela, asasínaa mentres se está espindo, e filma a expresión de horror da súa cara, que despois contempla nunha proxección na súa casa. Unha tras outra vai matando mulleres indefensas para filmar a súa agonía.