As imaxes fanse (máis) reais

Desde hai uns anos asistimos imparables á incorporación da fotografía nos circuítos expositivos. Photogalicia, a extensión galega de Photoespaña, é o exemplo máis palpable. Agora volve repetir tándem coa Fundación Caixa Galicia para presentar un programa onde a fotografía social volve ser o eixe sobre o que gravita. As fotos do real enganchan ao público con facilitade e o converten nunha das citas da temporada.

Vigo é unha das cidades máis sensibles ás exposicións fotográficas. Acolleu durante máis de dúas décadas a Fotobienal e polas salas da cidade pasaron as instantáneas dos grandes fotógrafos das axencias máis relevantes (coa Magnum como estrela), así como as imaxes máis impactantes publicadas nas revistas Life, Harpers Baazar ou Newsweek. Non é de estrañar que a cidade se incorpore ao listado de sedes da Fundación Caixa Galicia. E menos aínda que o faga coa exposición máis atrevida e críptica de todas as que presenta neste cartel: a imaxes Frías, fráxiles, durmintes de Victoria Diehl. Unha mostra na que a artista aproveita as técnicas dixitais para facer unha revisión da escultura clásica e os seus cánones. Ademais, a artista estará presente nunha das actividades paralelas que a Fundación Caixa Galicia ofrecerá para acompañar as exposicións: expicarlle aos grupos escolares dos institutos a conversar sobre o proceso creativo e o resultado do mesmo.

O prato forte
Pero sen dúbida, a exposición estrela desta edición é Máis real que a realidade na que se exhibe un percorrido pola obra de Eugene Smith, unha das principais figuras da fotografía humanista, que fixo un percorrido obsesivo pola busca da verdade. A exposición cocentra nunhas duascentas instantáneas as series que este fotógrafo creou arredor dos anos 40 e 50 como “Country Doctor” (Doutor rural), “Nurse Midwife” (Comadrona), “A man of Mercy” (Un hombre piadoso) e “Spanish Village” (Un pobo español) máis os proxectos individuais “Pittsburgh” e “Minamata”. “Spanish Village”, publicada a principios dos cincuenta na revista Life, foi unha das súas series máis aclamadas. Smith quería evidenciar a precariedade na que vivían algúns lugares na posguerra española, para iso acudiu a Deleitosa (Estremadura) onde fotografou o estilo de vida costumbrista e arcaico no que vivían os seus habitantes, lonxe de todo tipo de progreso. As imaxes amosaron a miseria española da posguerra, foron censuradas polo franquismo e acadaron cotas de popularidade internacional.