Marcos Calveiro gañou onte o premio O Barco de Vapor que convoca a editorial SM coa novela xuvenil O canto dos peixes . O premio conta cunha dotación de 10.000 euros. O escritor aurosán escribiu O canto dos peixes, unha historia sobre o mar galego e a súa degradación, durante o 2007, simultaneando a súa redacción coa de O Carteiro de Badgad, a obra coa que gañou o Premio Ala Delta de Literatura Infantil o pasado ano. E antes do verán, o escritor publicou con Xerais Festina Lente, a súa primeira novela para adultos, moi valorada pola crítica. É unha vaga afortunada para este escritor e avogado. "Moi circunstancial", asegura. "Xa a xente me vacilou bastante. O venres escribín no meu blog que estaba pasando por unha seca literaria de seis meses que me tiña preocupado e xusto onte concedéronme este premio".
