Obras publicadas entre 1920 e 1975 por galegos e españois exiliados a Arxentina. Este é o contido da Biblioteca do Exilio, que a Federación de Sociedades Galegas nesta república abría o pasado venres dentro da Biblioteca Galega de Bos Aires. Entre os volumes que se poden atopar neste espazo están primeiras edicións de obras realizadas por autores galegos e casteláns no exilio. Tamén se poden ver as coleccións Hórreo e Dorna que dirixiron Antonio Cuadrado e Luís Seoane para a editorial Emecé, canda a de editoras coma Nova ou Botella al Mar.
