Un descanso na loita. Fotografía dos Irmáns Mayo.
Era unha axencia fotográfica con nome de familia creada por tres galegos e dous madrileños. Hermanos Mayo desenvolveu un intenso e comprometido traballo fotoxornalístico ao longo da Guerra Civil e, rematado o conflito, continuou en México o labor. Agora o fotógrafo Xurxo Lobato recupera para Galicia unha mostra do seus testemuños coa exposición Hermanos Mayo. Guerra Civil Española que se pode ver ata o vindeiro 23 de setembro no Centro Sociocultural Caixa Galicia da Coruña.
Na realidade non eran todos familia, nin se apelidaban Mayo. A axencia naceu do encontro dos irmáns Xulio, Francisco e Cándido Souza Fernández, da Coruña, cos madrileños Faustino e Pablo del Castillo Cubillo. O nome reflectía o compromiso social destes fotógrafos, que percorreron diferentes frontes durante a guerra retratando a vida nas trincheiras e na retagarda cunha aguda ollada social.
Con esta mostra, o coñecido fotógrafo galego afonda no seu traballo encol da memoria histórica, un ámbito que xa tratou coa mostra Os rostros da memoria, centrada nos represaliados polo franquismo. Segundo asegura Lobato, a época da Guerra Civil e mais da república “atráeme moito porque foi un momento de ilusión no que se comezou a gozar da liberdade e máis da autonomía. Ademais a guerra tan tamén ese aspecto de loita entre irmáns, e tamén hai un aspecto místico, eu síntome fondamente republicano e atraeme a loita desa xente que defendeu como puido eses ideais”.
