Diferentes institucións coordinadas polo Instituto Lucense de Desenvolvemento Económico (INLUDES) buscan o financiamento da Unión Europea para a segunda fase de desenvolvemento do proxecto Vías Atlánticas. A iniciativa busca recuperar as vías romanas que percorrían a actual provincial de Lugo e conectaban o convento xurídico coas outras cidades da provincia romana de Gallaecia. Na primeira fase do proxecto, os esforzos se centraron en localizar o trazado da vía XIX, que conectaba Braga con Astorga penetrando por Lugo. Nesta segunda fase, preténdese localizar o trazado que partía do Lugo romano en dirección sur cara Braga, así como limpalo, sinalizalo e divulgado, así como estudar o percorrido da vía XX, que era unha desviación da XIX que chegaba ata a Costa da Morte.
O obxectivo do proxecto non é tanto atopar o camiño orixinario, ás veces de localización moi díficil, senón crear un roteiro cultural. O proxecto de investigación e divulgación remitido á Unión Europea ten un custe de 1.6 millóns de euros, dos que se lle solicita á UE o 75%. A resolución está prevista para antes de final de ano.