Sesenta e oito grupos subirán ao Castro a tocar nos Castroconcertos deste ano

O vindeiro venres 2 de maio, ás 23 horas no parque de O Castro en Vigo, dará comezo a sexta edición dos Castroconcertos, evento que forma parte do programa de ocio alternativo xuvenil da Concellería de Xuventude, "Súbete ao Castro". Nesta edición, serán 68 as agrupacións musicais participantes, que ofrecerán un total de 34 concertos con entrada de balde entre os meses de maio e setembro. A meirande parte dos grupos musicais que participan neste programa son usuarios dos locais de ensaio do Concello de Vigo. O programa quere servir de plataforma de lanzamento da creación musical da mocidade viguesa, ofrecéndolles un espazo onde presentar as súas creacións. No primeiro concerto desta temporada actuará Track Asedio, Duke Sam, Sikeity, Dr. Valda, Dj B-neil, Dj Fabio e Antuán. Nas últimas cinco edicións deste evento, realizáronse unha media de 16 concertos por edición, e de 31 grupos participantes, cunha asistencia total de 5.719 persoas.