Pontevedra acolle hoxe unha nova xornada da Semana Galega de Filosofía, na que personalidades como Francisco J. Ayala ou Ramón Villares analizarán a xenética, o deseño e a nación cultural. Na sesión de onte, a subdirectora do Plan Galego de I+D+i, Xulia Guntín, analizou os retos da ciencia e da tecnoloxía en Galicia ao abeiro da política pública nesta materia. Para Guntín, “temos un sistema galego desequilibrado e escasamente articulado, cun reducido peso do sector empresarial, máis acusado cando falamos en termos de esforzo financeiro, e con escasa capacidade de absorción de persoal altamente cualificado”. Maila este panorama considera que o futuro “estará ligado ao futuro do espazo europeo de investigación e ás estratexias e oportunidades que se abran no marco europeo”.
