A coincidir coa mostra “A historieta galega: 1973-2008” que pode verse ata o vindeiro mes de xuño no Auditorio de Galicia, botamos man dos fondos do noso soportal para facer un percorrido sintético e visual pola historia da nosa banda deseñada. Un xeito rápido e sinxelo de se facer unha idea de como foron as cousas e como son agora.
Malia que hai antecedentes puntuais previos, considérase que a historia da banda deseñada galega comeza por volta de 1973 cos traballos dos grupos Do Castro e mais de Xaquín Marín e de Reimundo Patiño. De calquera xeito, non podemos concibir esta historia coma unha continuidade de relacións entre autores e iniciativas. A febleza das súas estruturas e o escaso alcance das publicacións fixo que os nosos autores non tivesen, ata o de agora, un coñecemento completo dos traballos previos. Deste xeito, dáse a circunstancia de que a BD galega levase reinventando constantemente desde os seus comezos, posiblemente máis aberta a influencias foráneas do que á unha continuidade histórica.
