Un Woody Allen insólito, desenvolvendo un rexistro absolutamente imprevisible nel, preséntanos un texto de moi alta calidade, como non podería ser doutro xeito, no que nos mostra o difícil mundo da adolescencia e a vellez, das relacións de parella, ou da maxia, cunha gran dose do seu humor, e personalizado na familia Pollack.
Un pai, unha nai e dous fillos nunha situación de absoluta infelicidade. O marido que atravesa a crise dos corenta, a muller que soporta os devaneos amorosos do seu esposo e tropeza na relación cos seus fillos; o pequeno deles, unha firme promesa de delincuente profesional e o maior, tatexo e cun "coeficiente intelectual de 148", sumido nunha realidade paralela que lle proporciona o mundo da maxia.
