A Real Academia Galega (RAG) continúa o seu traballo sobre os nomes dos lugares. Se onte coñecíamos a súa implicación no proxecto Toponimia de Galicia, hoxe sabemos que a Academia está a traballar coas súas homólogas de todo o Estado para fixar unha normativa que regule o emprego dos topónimos nas diferentes linguas oficiais. O presidente da RAG, Xosé Ramón Barreiro, explicou onte este proxecto ós medios.
Varias linguas, varios nomes
A existencia de varias linguas no Estado Español leva a que naquelas zonas nas que coexisten outros idiomas co castelán existan moitos topónimos que teñen unha versión en cada lingua. Esta situación provoca a miúdo confusións á hora de saber como hai que referirse a lugares concretos. Para definir unha normativa concreta no emprego dos topónimos nas diferentes linguas do Estado as academias de Euskadi, Cataluña, España e Galicia están a realizar un traballo conxunto. No mesmo sentido búscase unificar un criterio á hora de empregar topónimos estranxeiros e ver se se respecta a súa fonética, grafía ou outras cuestións.
Unha comisión con representantes das diferentes academias do estado reunirase periodicamente para tratar estas cuestións.
Organizar
Segundo sinalou onte Xosé Ramón Barreiro, a intención das academias é facilitar o traballo a medios de comunicación e outros profesionais de cara ó seu traballo. O presidente da RAG sinalou que é partidario de "ser respectuosos" coas formas orixinais dos topónimos peninsulares, aínda que esta é unha cuestión que aínda está por estudiar.
Para Barreiro aínda hai que "ver se a normativa propia da zona marca o emprego" dunha ou doutra forma dos nomes de lugar, e puxo como exemplo o caso galego, no que a toponimia oficial está unicamente no noso idioma.
Máis da RAG
Durante a primeira quincena do mes de xuño que agora comeza, a Real Academia Galega ten previsto celebrar un novo plenario no que se designará a persoa homenaxeada no Día das Letras do 2003. Cada unha das candidaturas deberá estar apoiada por tres académicos, e entre os nomes que se están a barallar nos medios de comunicación están os de Avilés de Taramancos, Álvarez Blázquez e Florencio Delgado Gurriarán entre outros.
Nesta xuntanza a RAG tamén decidirá quen ocupa a vacante que ficou na institución trala morte de Marino Dónega, posto para o que se fala de Manuel María, Xosé González e Daniel Cortezón.
