Cando Ánxela Bugallo anunciou a paralización da construción da Cidade da Cultura advertiu da necesidade de definir os contidos do complexo do monte Gaiás. Agora, a conselleira acaba de anunciar a convocatoria dun concurso público (cun orzamento de 85.000 euros) para a contratación dunha empresa que canalice as propostas sociais sobre este tema. Ademais, a consellaría de Cultura e Deporte vén de bosquexar as primeiras ideas. Por unha banda a substitución do Edificio das Novas Tecnoloxías pola creación da Casa Mundo, segundo figura nunha nota de prensa sería un espazo para a diversidade cultural e tendencias culturais emerxentes e que podería ser sede dalgún organismo internacional como a UNESCO. Pola outra, a transformación do Teatro da Música nun espazo polivalente con dous auditorios, sala de exposición e sede dunha factoría cultural que funcionará como laboratorio de ideas e deseños.
Máis información no web da Xunta , en La Voz de Galicia en El Correo Gallego, en Vieiros e nos nosos arquivos
