Dous dos elementos do patrimonio de Vigo que corrían un maior risco de degradación, o barco Bernardo Alfageme e o depósito romano de Mirambell, verán en breve cadanseu proxecto de recuperación. O histórico pesqueiro Bernardo Alfageme, que correu en varias ocasións serio perigo de despezamento pola falta de fondos para a súa recuperación, foi finalmente retirado do peirao e levado a terra. Agora o concello, a través de fondos do programa Interreg, restaurará o navío, aínda que só externamente, e depositarao en terra para a súa exposición. Mentres, un convenio do goberno local coa Universidade de Vigo permitirá que se faga a definitiva escavación do asentamento Romano de Mirambell, cuxa degradación xa provocara diferentes protestas e fora recoñecida polo propio concello. Os traballos desenvolveranse ao longo de dous anos e ao seu remate os restos serán visitables polo público. O concello achegará 150.000€a este proxecto, que completará deste xeito os traballos que quedaran pendentes na última campaña de escavación, no ano 2003.
Máis información sobre o Bernardo Alfageme en Faro de Vigo e nos nosos arquivos; sobre as obras en Mirambell na edición de hoxe de Atlántico Diario e nos nosos arquivos
