As I Olimpíadas Rurais de Galicia combinarán xogo tradicional e deporte en Friol

O Club Deportivo Hércules, co apoio do Concello de Friol e da Xunta de Galicia organiza as I Olimpíadas Rurais de Galicia. A cita, que se deu coñecer este 9 de xaneiro, celebrarase no municipio lugués entre os días 28 e 30 de xuño vindeiros, a enfrontar a un máximo de 24 equipos de todo o país.

A intención da organización é ir incrementando o número de equipos participantes en sucesivas edicións. As disciplinas nas que se competirá inclúen desde lanzamento de lastro, carreira de sacos ou escalada da cucaña, "ata xogos tan tradicionais como a carretilla, a cadeira da raíña ou o salto á comba". Canda aos eventos deportivos, a cita incluirá tamén gastronomía e concertos.

Segundo sinala a Xunta na presentación do evento, a organización "tomou como referencia as únicas olimpíadas rurais que hai en España, as do pobo de Los Pedroches, en Córdoba, que levan celebrándose dende hai 14 anos".

No entanto, no noso propio país existiron e mantéñense outras Olimpíadas Rurais con xogos e formatos similares. Así, as de Couzadoiro, en Ortigueira, celebraron o pasado mes de setembro a súa novena xeira, en Xinzo artellaron no mesmo mes as II Olimpíadas Rurais Interpobos, e en Landrove (Viveiro) chegaron á sexta edición o pasado mes de outubro. En Chantada, pola súa banda, acumularon ata 2018 dez edicións das súas propias olimpíadas.