O Salón do Libro de Pontevedra homenaxeará a Marica Campo e Xosé Cobas

A XXIIIª edición do Salón do Libro Infantil e Xuvenil de Pontevedra centrarase na arte e a creatividade. O evento, que terá lugar entre o 11 e o 27 de marzo no Pazo da Cultura ven de sinalar tres nomes propios para esta edición, os dous autores homenaxeados e a artista responsable do seu cartel. Así o Salón deste ano renderá homenaxe, no que ten que ver co uso da palabra, á escritora Marica Campo (O Incio, Lugo, 1948)e no eido da ilustración a Xosé Cobas (Negreira, A Coruña en 1953). O día 26 será a xornada na que ambos recibirán o seu recoñecemento ás súas traxectorias e achegas.

Por outra banda tamén se deu a coñecer a autoría do cartel desta edición ,q ue correrá a cargo da artista viguesa Bea Gregores. A ilustradora, gañadora de diversos premios no mundo da ilustración e do cómic, foi a escollida entre un total de 39 propostas de portfolios recibidos á convocatoria aberta. En rolda de prensa Gregores quixo avanzar algo sobre o traballo que vai desenvolver para o Salón: "A arte, a creatividade, tema do Salón deste ano, están moi vinculadas ao meu traballo. Na proposta que teño na cabeza tentarei transmitir todas as ramas da arte, literatura, escritura, música e todo do que poderemos gozar no Salón.", dixo.