A Deputación de Lugo adhírese á Ruta Transrománica

O presidente da Deputación de Lugo, José Tomé Roca, anunciou este 22 de outubro a incorporación deste organismo a Ruta Transrománica. Este Itinerario Cultural Europeo, que conta co aval do Consello de Europa, pon en valor as construcións de estilo románico a nivel continental e transcorre por Austria, Alemaña, Francia, Italia, Romanía, Portugal, Serbia, Eslovaquia e España. No noso Estado, unicamente o mosteiro de Santo Domingo de Silos e mais a Cidade de Zamora estaban ata o momento integradas no proxecto.




A Deputación presentou para a súa incorporación á ruta unha listaxe de dez igrexas noutros tantos concellos da Ribeira Sacra. O mosteiro do Divino Salvador, en Ferreira de Pantón; a igrexa de San Xoán da Cova, en Carballedo; a igrexa de Santa María de Nogueira de Miño, en Chantada; a igrexa de San Pedro de Ribas Altas, en Monforte de Lemos; a igrexa de San Facundo de Ribas de Miño, en Paradela; a igrexa de San Nicolás ou San Xoán, en Portomarín; a igrexa de Santa María de Torbeo, en Ribas de Sil; a igrexa de Santo Estevo de Ribas de Miño, no Saviñao; a igrexa de Santa María de Proendos, en Sober; e a igrexa de Santa María de Taboada dos Freires, en Taboada son os templos que se incorporarán ao proxecto internacional.

Tomé anunciou a súa intención de incluír no futuro novos monumentos no itinerario ao tempo que destacou que integración neste proxecto "supón un importante apoio para a candidatura da Ribeira Sacra a Patrimonio da Humanidade e para a promoción do Camiño de Inverno de cara ao Xacobeo 2021".