Vilagarcía e O Barco fan volver a música polas festas

Chegan nestas datas algunhas das festividades locais máis tradicionais e algúns concellos non queren renunciar a que a súa cidadanía as perciba dalgún xeito, dentro das circunstancias e coas debidas medidas de seguridade. É o caso de Vilagarcía de Arousa e O Barco de Valdeorras coa festividade de Santa Rita. Pola contra o Concello de Santiago ven de renunciar a calquera tipo de acto festivo ou cultural co gallo da celebración da festa local da Ascensión este xoves, unha das festividades locais máis celebradas na capital galega tradicionalmente.

O talento local será o protagonista cultural da festa de Santa Rita en Vilagarcía de Arousa. O concello quere manter así o ánimo festivo de estes días e apoiar ao sector da cultura da súa área. O consistorio ofrecerá dúas sesións musicais en directo en liña a través de Facebook, Youtoube e o Canal Rías Baixas de TDT, con cinco formacións locais que actuarán no auditorio municipal, con técnicos de son e catro cámaras. Os dous programas serán emitidos os mesmo día 22, festividade de Santa Rita, conducidos por Xoán Mariño e Erea Hierro, tamén de Vilagarcía, que interactuarán co público ao longo da emisión das actuacións de cinco formacións locais. O Grupo Nós de Sobradelo e Dani Barreiro & Friends farán a sesión matinal mentres que á noite actuarán TNT Band, PRF Trío e o grupo Salnesianos. Segundo a concelleira de Cultura, Sonia Outón, un dos obxectivos que se pretenden acadar é o de seguir apoiando e promocionando a Cultura dende o Concello apostando polo talento local, nun momento tan difícil para o sector. Ahituvi, a asociación de hostaleiros, promoverá que dende os seus establecementos se conecten as pantallas á emisión que o Concello fará dende o seu Facebook e o canal de Youtube e a canle Rías Baixas pola TDT.

Formato adaptado de Culturactiva para O Barco
No Barco de Valdeorras, en Ourense, a celebración de Santa Rita é unha das súas festas máis arraigadas e malia as circunstancias tampouco deixará fóra o carácter lúdico que achega a música en directo nas rúas. Coa intención de levarlle á cidadanía unha mensaxe de optimismo e de ánimo, por programouse un "Concerto Vertical" da Fanfarria Taquikardia, unha proposta musical itinerante, compatible coas restricións actuais de mobilidade. Este formato é un dos que a cooperativa Culturactiva deseñou especialmente para estes tempos de limitacións. O concerto comezará ás 12,00 horas na praza do Príncipe, e se realizarán paradas de 15 minutos en varios puntos, sinalados no cartel, para permitir ao público das diferentes zonas que poidan seguir o espectáculo sen problemas desde as casas. A cooperativa e produtora tamén levará a cabo a retransmisión a través de YouTube en directo en Vilagarcía da obra de teatro Senior o vindeiro día 30 de maio, desde o auditorio.