AFundación crea un espazo virtual para ofrecer contidos cada día

A obra social da empresa bancaria Abanca, Afundación, ven de activar na súa web un espazo de contidos para compensar a ausencia de actividade presencial nas súas sedes, pechadas con motivo do COVID-19. Afundación en casa preséntase coma un espazo de encontro virtual que reúne voluntariado, cultura, formación e apoio aos maiores e que anuncia ir aumentando cada día con novos contidos. O espazo ofrece emisións en directo; visitas guiadas; publicacións didácticas, moitas delas relacionadas cos catálogos das exposicións artísticas; conferencias e charlas e un fondo vivo integrado xa por máis de 300 recursos educativos, sociais, culturais, de acompañamento telemático e de voluntariado para seguir desde a casa.