"Se ti non podes ir á Torre de Hércules, a Torre irá á túa casa". Así titulan a iniciativa da visita guiada que hoxe se realizará á Torre de Hércules, na Coruña, a partir das 12:00. A visita pódese seguir desde o facebook oficial da Torre de Hércules. E tamén ás 12:00 comezan as sesións virtuais da Rede Museística da Deputación de Lugo. Nestas sesións, desenvolvidas na plataforma Zoom, convídase aos nenos a crearen o seu propio museo. Era unha proposta xa existente na oferta didáctica da rede luguesa, que agora chega a Internet por mor do confinamento. “Día a día acompañaremos aos nenas e nenos para que creen os seus museos persoais con pezas de valor para eles, para que dialoguen cos seus maiores e recuperen a memoria, as raíces e a súa historia, para que debuxen, pinten, imaxinen e creen”, explica Encarna Lago, xerente da Rede Museística. Para participar cómpre inscribirse na dirección electrónica redemuseistica@gmail.com, a través da que lles facilitarán o enlace e os contrasinais de acceso.
