Os premios á mellor dirección e ao mellor filme para Xiao Xian confirmaron o cineasta Jiajie Yu Yang como grande vencedor da XX Mostra de Curtas Vila de Noia, que pechou as súas portas o pasado 9 de novembro. Os galardóns de interpretación do certame, pola súa banda, foron ex aequo para Luisa Gavasa, por María e para Rosario Pardo, por Happy Friday, mentres Antonio Mayáns foi seleccionado como mellor actor polo seu rol en Perdóname.
O xurado, composto por Begoña Vargas, Natalia Rodríguez, Javier Prada, Gema Neira e o concelleiro de Cultura José Pérez, acordou outorgarlle Premio Honorífico desta xeira a Carlos Blanco, mentres o de mellor guión foi para Fran X. Rodríguez e a Marcos Nine por Beautiful boy. O comité outorgoulle tamén unha mención especial a Charlotte Marron por Lay Them Straight.
A mellor curtametraxe de animación da mostra foi a arxentina Ailín en la luna, e na categoría amateur, foi seleccionada Los invisibles, de Santiago Teijelo Vázquez. O premio do público foi para Será nuestro secreto de Sergi González.
