O Festival Internacional de Curtas de Bueu entregaba o pasado sábado os seus galardóns, co filme romanés Cadoul de Craciun como grande vencedor. A película que aborda a represión de Ceaușescu con grandes doses de humor negro obtivo a Ánfora de Ouro, dotada con 2.000 euros, ademais dos premios ao Mellor guión e ao Mellor actor para o protagonista, Adrian Vancica. Canda a este traballo, a coprodución bielorrusa-alemá Lake of hapiness fíxose coa Ánfora de Prata e cos premios á Mellor dirección artística e á Mellor actriz para Anastasasiya Plyats.
O Premio do Público foi para a fita de animación Mémorable, mentres Martín Romero obtivo o Premio R á mellor curtametraxe galega con La noche. O Premio Fundación Novas a mellor curtametraxe española, pola súa banda, levouno o filme vasco 592 metroz goiti. O director tailandés Apichatpong Weerasethakul obtivo o recoñecemento á Mellor curtametraxe experimental por Blue e o canadiano Jeremy Comte fíxose con Fauve co Premio CREA á mellor dirección.
