AGADIC convoca as axudas ás industrias culturais

O Diario Oficial de Galicia publica hoxe a Convocatoria de subvencións á distribución para as industrias culturais, asociacionismo profesional e salas de artes escénicas. As tres liñas de axudas totalizan un investimento de 460.000 euros, que se inscriben no orzamento deste exercicio no canto de se separar en varios anos como viña sendo habitual. Por ámbitos, 350.000 euros destínanse ás axudas á distribución de espectáculos fóra do país e mais para a asistencia a feiras. O apoio ao asociacionismo profesional dispón de 50.000 euros, mentres os 60.000 restantes destínanse ao apoio ás salas privadas do país. Os interesados nestas últimas teñen un mes para as solicitar, mentres que as axudas á distribución teñen prazo ata o 30 de setembro.