Queremos Galego denuncia a pregunta aos pais sobre a lingua

O xeito en que a Consellaría de Educación formula a cuestión aos pais sobre a lingua materna dos seus fillos prexudica o galego. Así o asegura a plataforma Queremos Galego, que sinala que no cuestionario que recibiron os pais dos alumnos que comezan Segundo Ciclo de Educación Infantil non se informa dos efectos concretos que terán as respostas na organización das clases. Ademais, considera que ao perguntar pola "lingua materna" dos alumnos, e non pola lingua na que os pais queren que se dea a clase, dificúltalle a elección do galego a familias castelánfalantes. Segundo explican desde a plataforma "unha persoa pode falar castelán mais non por iso querer que o seu fillo ou a súa filla deixe de aprender en galego". O colectivo anima a todos os pais consultados a responder que a lingua materna dos seus fillos é o galego.