“O diálogo e a liberdade son os alicerces da política cultural”: apunta Feijoo no discurso de investidura

As dez da mañá comezaba no Parlamento o debate de investidura do presidente da Xunta co discurso de Alberto Núñez Feijoo. Unha intervención de case dúas horas nas que enumerou os compromisos formulados durante a campaña electoral. No que atende a materia cultural, estableceu que o “diálogo e a liberdade” serán os alicerces da política que ha de estar promovida e iniciada polos creadores. Para referirse ao tema do idioma apelou á “amabilidade lingüística” ao tempo que anunciou a derogación do decreto do galego no ensino. O novo decreto terá como finalidade o “impulso do trilinguismo e o respecto dos dereitos individuais das familias e dos alumnos”. Con respecto aos medios de comunicación, anunciou unha nova lei da CRTVG e, mentres a reforma non se tramita, pactará no Parlamento o nomeamento do seu director.