Un ciclo exhibe as relacións do circo con outras artes escénicas

Flamenco, malabares, clown, danza contemporánea... o novo circo fusiónase con outras disciplinas escénicas. Novas tendencias que se están a desenvolver en toda Europa e que o Centro Dramático Galego escolma nun ciclo. Baixo o nome de Circo en escena catro funcións permitirán achegar o máis arriscado, experimental e creativo do novo circo. Coñéceas e programa a túa visita ao Salón Teatro do 5 ao 20 de febreiro en Santiago.

Circo - Danza contemporánea
Contigo
O ÚLTIMO MOMENTO (Portugal)
Sábado 7 de febreiro ás 20.30 e domingo 8 ás 18.00 horas

Estreado en 2006 no Festival de Aviñón, no ámbito do programa "Le Sujet à Vif", Contigo é un espectáculo nacido do encontro entre dous artistas portugueses: o coreógrafo Rui Horta e o acróbata do mastro chinés João P. Pereira dos Santos. A danza contemporánea e o novo circo fúndense nunha linguaxe común onde as fronteiras entre estas dúas disciplinas artísticas parece non existir. O escenario está apenas ocupado por algúns obxectos, un mastro chinés, un tótem que marca fatalmente ese espazo e lanza un desafío vertical. Un corpo responde a ese mesmo desafío, á vertixe, ao risco e á posibilidade de caer.

Circo - Flamenco
Malgama
VARUMA TEATRO (Andalucía)
Xoves 5 e venres 6 de febreiro ás 20.30 horas

Malabaristas que rouban os lunares dun traxe de flamenca para xogar con eles e botalos ao compás mentres se desenvolve un espectáculo de canto e de baile, unha bailaora coa súa bata de cola suspendida no aire compartindo escenario cun acróbata ou pallasos por peteneras, que segundo a lenda traen mala sorte, son algúns dos números deste espectáculo onde se dan a man o circo contemporáneo, a música en directo e o flamenco.

Esta ampla mostra é unha amálgama que xoga co nome da obra e do seu protagonista, Malgama, un personaxe que padece a eterna insatisfacción de non sentirse completo porque lle falta o "a" do amor e da amizade. Ao longo do espectáculo acompañamos a Malgama nunha viaxe iniciática na procura do motor que o conduza a evolucionar, o pulo que lle dará sentido á súa vida. E é que moitas veces buscamos no exterior o que só podemos encontrar no noso propio interior.

Circo - Danza acrobática
Ieto
COMPAÑÍA IETO (Francia)
Xoves 19 e venres 20 de febreiro ás 20.30 horas

Jonathan Guichard e Fnico Feldam, funámbulo e acróbata, forman a compañía Ieto, unha proposta de danza acrobática contemporánea, chea de ideas e creatividade, que investiga a expresividade corporal pero tamén o espazo e os elementos escénicos.

Durante o transcurso do espectáculo, a complicidade lúdica entre os dous artistas salta á vista; un dos personaxes, de forte concentración, contrasta coa figura do outro, de espontánea intelixencia e tranquila indiferenza. Ante si teñen sete enormes táboas de corenta quilos cada unha, dúas ou tres barras, unha corda, algunhas cuñas... e con elas fan construcións e estadas e xogan cos contrapesos, as suspensións e os desequilibrios, ata chegar ao momento de emprenderen a travesía polo baleiro sobre o cable tendido, entre cuxo silencio xorde o renxer da madeira sometida a esforzos. Unha actividade de risco artístico e físico de gran complexidade técnica que nos fai conter a respiración.

Circo - Clown ESTREA
As vingadoras
MAQUINARIA PESADA (Galicia)
Sábado 14 de febreiro ás 20.30 horas e domingo 15 ás 18.00 horas

As actrices Marian Bañobre e Isabel Risco estrean As vingadoras, o seu novo
proxecto común. Trátase dun espectáculo de clown baseado na serie televisiva inglesa dos anos 60 Os vingadores e que supón o primeiro espectáculo da recentemente constituída compañía Maquinaria Pesada.

Algo cheira a podre aí fóra, haberá que investigar e enfrontarse a quen ou ao que sexa. Coa súa preparación e coñecementos, as astutas Emma e Pili, unha vez máis, resolverán un caso de máxima importancia para a sociedade galega. Este tándem é convocado outra vez pola nai para resolver un novo enigma, cal será desta volta? Que aventuras as agardan? Sairán airosas deste novo reto? Sobrevivirán? Supervivirán?...