Cultura destina 252.500 euros a recuperar o Templo da Veracruz no Carballiño

As obras de construción do templo da Veracruz, proxectado por Antonio Palacios, déronse por rematadas en 1962. Pero quedaban numerosos detalles inacabados con respecto das previsións iniciais que fixeron que o edificio se fora deteriorando co paso do tempo. Por iso, a Consellaría de Cultura acaba de anunciar a vindeira axudicación dunha actuación rehabilitadora nese edificio por importe de 252.500 euros. Tal e como explica a nota de prensa deste departamento, “a actuación centrarase na torre, para garantir a conservación adecuada dun dos elementos máis característicos” deste monumento declarado Ben de Interese Cultural.