Os documentais galegos acoden ao Málaga Markets que comeza hoxe

Málaga Markets é o nome co que a capital andaluza celebra os mercados de longametraxes, animación, telefilmes e documentais. Unha cita á que acode o Consorcio Audiovisual Galego co catálogo Docs Galicia 08, que inclúe catro traballos documentais realizado no país. Dentro deles figura Manuel e Elisa, cuxos produtores (a empresa Tic-Tac) acoden para contar a súa experiencia en “Nacido en Málaga”, unha sección creada no 2007 cunha bolsa de apoio económico para completar o financiamento das producións audiovisuais. Ademais, Tic-Tac aproveitará para presentar a película no marco dunha proxección especial fronte a distribuidores e compradores internacionais.