CORREO
RSS
Noticias
A Coruña achega contidos en liña na plataforma Respira Cultura
Xénero: | 24 / 9 / 2020
Ata o vindeiro 12 de outubro o Concello da Coruña pon en liña 54 actuacións de 47 proxectos no marco da nova plataforma Respira Cultura. O goberno local presentaba onte esta iniciativa, na que realizou un investimento de 100.000 euros e que pretende ser "unha nova ventá á emoción, á ilusión, ás artes vivas e á música ao vivo, cunha programación dixital de actividades culturais aberta, accesible, apta para todos os públicos e que nos quere convidar, de novo, a sentir e respirar a cultura ao vivo". As actuacións que se subirán á rede foron gravadas ao longo de dúas semanas nos escenarios do Fórum Metropolitano, o Centro Ágora e o Pazo da Ópera e estrearanse a razón de 4 ou 5 ao día.
Cantos na Maré trasládase a Santiago e estrea formato
Xénero: | 21 / 9 / 2020
Coa nova marca Maré-Música y Artes Atlánticas o Festival Cantos na Maré presentaba este venres 18 de setembro en Compostela o seu novo formato. Logo de quince edicións en Pontevedra, Santiago de Compostela será a nova sede do encontro dedicado á música da lusofonía, que amplía ademais o seu campo de acción a novos ámbitos culturais. A produtora Nordesía, que organiza o evento, adiantou que a cita contará coas seccións MaréLab "un espazo de investigación para apoiar o crecemento da economía creativa", MaréNet, "para situar Compostela como referencia do negocio das industrias culturais", CineMaré, "cunha carteleira audiovisual procedente das culturas atlánticas", GastroMaré, que se define como "un encontro entre cociñeiros e música" e MaréTV, "o apartado audiovisual da plataforma de música Tolemias" que achegará contidos do evento en streaming. O festival, que se integra na marca FEST Galicia, inclúe ademais no seu programa a entrega dos premios da música e da poesía galego-portuguesa aRi[t]mar.
Dequenvessendo debuta co Canto das xacias
Xénero: | 17 / 9 / 2020
Logo de catro anos de actividade, o grupo folk Dequenvessendo presenta o seu debut discográfico.Canto das xacias achega once tema de composición propia no que o grupo explora, mediante a confluencia de "sonoridades celtas, atlánticas e de raíz" a "lenda dos xacios ou xacias, os seres metade humanos e metade peixes que habitan, segundo o imaxinario popular, no fondo dos pozos e dos ríos galegos". O disco, editado por Xingra e producido por Mirmidón, chega logo do éxito dunha campaña de micromecenado.
Colectivos galegos súmanse as protestas do sector cultural do Estado
Xénero: | 16 / 9 / 2020
Coa Asociación Sindical de Profesionais Técnicos do Espectáculo como núcleo principal, diferentes colectivos culturais e artistas do país están anunciar estes días o seu apoio ás protestas convocadas a nivel estatal para o este 17 de setembro. Alertarojaeventos / MUTE (Movilización Unida de Trabajadores del Espectáculo) son as plataformas que chaman a se mobilizar en cidades de todo o Estado para reclamarlle ao Goberno Central que considere prioritario este sector e que se recuperen as axendas culturais e de eventos das administracións públicas. Entidades como a Asociación Galega de Profesionais da Xestión Cultural ou Músicas ao Vivo anunciaron o seu apoio a estas mobilizacións. De xeito concreto, chámase a se manifestar, con vestimenta negra, en Compostela no obradoiro ás 20:30 horas e en Vigo na Rúa García Barbón.
A Coruña presenta o seu plan de reactivación cultural
Xénero: | 15 / 9 / 2020
O Teatro Rosalía acolleu este 14 de setembro a presentación do programa de actividades culturais que fan parte do Plan de reactivación económica, social e cultural da Coruña (PRESCO). Segundo adiantou a alcaldesa, Inés Rey, o apartado cultural deste plan conta cun orzamento de 300.000 euros co que se programarán máis de 100 actuacións de "grupos, artistas e compañías locais de música, danza, humor, teatro, e infantís" entre o 25 de setembro e o 29 de novembro en 36 prazas da cidade. Para alén desta primeira proposta, o Concello prevé ampliar esta iniciativa "xa que tamén estamos tratando de incorporar aqueles grupos e colectivos que tiñan previstas actuacións ao longo destes meses e que tiveron que cancelar os seus espectáculos como consecuencia da crise sanitaria", explicaba a alcaldesa.
A falta de apoio financeiro leva a suspender O Canteira Fest de Vilaboa
Xénero: | 11 / 9 / 2020
Dende a Asamblea da Mocidade de Vilaboa, organizadora do Canteira Fest, veñen de comunicar cancelación do evento previsto na Canteira de Paredes para o vindeiro 18 e 19 de setembro. Segundo o comunicado feito público a decisión ven motivada fundamentalmente pola mala situación financeira para a súa realización unha vez que se coñeceu a contía da axuda concedida pola Deputación de Pontevedra no programa de subvencións a espectáculos de música e artes escénicas, que outorgou 3.150 euros dos 10.050 solicitados. Desde a organización lembran que este festival ten unha valoración total de 20.000 euros e que malia ter recadado unha suma importante das empresas patrocinadoras, precisaría "unha maior aposta pola cultura das institucións publicas". Por outra banda, desde a Asamblea apuntan tamén como un segundo motivo á responsabilización persoal que recaería sobre os mozos e mozas organizadores no caso que se dera un gromo de coronavirus no festival, con penas punitivas elevadas por parte da Xunta de Galicia.
Nace a Orquestra Galega de Liberación
Xénero: | 10 / 9 / 2020
Dezaseis músicos residentes en Galicia reunidos en torno á música de vangarda, á busca de novas formas de creación espontánea e á improvisación como fonte de investigación conforman a Orquestra Galega de Liberación. A formación constituída por artistas e intérpretes recoñecidos nos distintos eidos da música clásica, do jazz, das músicas de vangarda e da performance preséntase este sábado no Auditorio de Galicia en Santiago cunha actuación de balde con reserva previa baixo as restricións de capacidade actuais. A orquestra está formada por Xacobe Martínez Antelo (contrabaixo e dirección), Max Gómez (batería), LAR Legido (batería), Javier Pereiro (trompeta), Olivier Cano (saxo alto), Xosé Miguélez (saxo tenor), Diego Alonso (saxo tenor), Rosolino Marinello (clarinete baixo), Rubén Fernández (voz), Faia Díaz (voz), Antonio Bravo (guitarra), Manuel Cebrián (guitarra), Elena Vázquez (violín), María José Pámpano (viola), Macarena Montesinos (violoncello) e Saúl Puga (contrabaixo).
O Salón Teatro de Santiago celebra o seu centenario cun ciclo de concertos
Xénero: | 9 / 9 / 2020
O Salón Teatro de Santiago, sede do Centro Dramático Galego (CDG) da Axencia Galega de Industrias Culturais (Agadic) desde 1999, celebra o centenario da súa inauguración en 1920 retomando hoxe mesmo a actividade pública co inicio do programa musical Mércores de varanda,que ofrecerá oito concertos de artistas e grupos galegos. O gaiteiro Anxo Lorenzo será o encargado de abrir hoxe este cartel, que se desenvolverá todos os mércores ata finais de outubro e polo que pasarán en total seis grupos e artistas do Fondo de Proxectos Culturais Xacobeo 2021 (Anxo lorenzo, Claudia Abril, Emilio Rúa, Xoán Curiel, Susana Seivane, SÉS, Dequenvessendo) e dous convidados do ‘coworking’ de emprendemento musical organizado pola Fundación Paideia e a EOI Padrón (Hugo Franco e Sofía Espiñeira).. Estes Mércores de varanda darán comezo cunha pequena actuación de cada un dos artistas desde o balcón do Salón Teatro para continuar a actuación no escenario. A entrada é gratuíta, previa retirada no despacho de billetes desde dúas horas antes do comezo de cada actuación e ata completar a capacidade dispoñible de 60 persoas máximo que neste momento a Xunta de Galicia permite.
O blues volve a Fisterra a contra reloxo
Xénero: | 8 / 9 / 2020
A cita coa música blues na Costa da norte, o Fisterra Blues Experience, ven de confirmar celebración e pechar cartel con tan só unha semana de antelación ao seu comezo. Así funciona agora mesmo a capacidade realista de previsión no sector cultural, que a falta de cinco días para a súa celebración os vindeiros días 11, 12 e 13 de setembro, puidemos coñecer os nomes dos artistas e as bandas que estarán presentes. A cita presentouse oficialmente o venres pasado e desde onte a oferta artística, que ofrece a presenza de nomes coñecidos da escena galega pero non renuncia tampouco a incluír referencias de corte internacional. Cun pé en cada unha desas polas está a Marcos Coll Band que actuará no evento xunto con Julian Vaughn e Mayka Edjole. The Limboos, Aló Django feat. David Regueiro, Marian Ledesma & Los Tinaquero Brothers representarán a música feita no país propiamente e tamén haberá espazo para artistas estatais e estranxeiros coma Greg Izor & Emilio Arsuaga ou El Barullo Tango. A Fisterra House Band, banda residente do festival, volverá a estar presente no evento actuando desde un barco no Blues A Bordo. Ademais, o programa inclúe pasarrúas con Brassica Rapa e unha actividade infantil a cargo de Pakolas. A Praza da Constitución e o Farod e Fisterra serán os lugares que acollerán as actuacións este ano, ademais do propio paseo en barco. Os residentes no Concello poden acceder a un cupo propio de entradas de balde para segurar que poden gozar tamén desta actividade. O evento preséntase este ano coma unha experiencia sanadora nun entorno hostil: "Agora máis que nunca, precisamos do benestar e da búsqueda dunha renovación que nos libere e nos faga presente a fraternidade, os vínculos coa comunidade, a terra e o mar, para alonxar por un tempo as hostilidades do mundo", expresa aorganización na páxina web do festival.
Compostela acolle unha nova edición das Xornadas de Música Contemporánea
Xénero: | 8 / 9 / 2020
Cinco concertos, un espectáculo de danza e unha exposición sobre novas formas de notación musical compoñen o programa da nova edición das Xornadas de Música Contemporánea de Santiago de Compostela. O Concello acollía onte a presentación desta iniciativa, que se desenvolverá entre o 9 e o 23 de setembro e que a entidade local organiza canda á Universidade de Santiago e o Centro Galego de Arte Contemporánea.