CORREO
RSS
Noticias
Ortigueira convoca un concurso iberoamericano de composición para bandas de música
Xénero: | 9 / 1 / 2008
Malia ser musicalmente máis coñecida polo festival celta a vila coruñesa de Ortigueira terá agora presenza internacional no circuíto das bandas de música. O Concello ven de presentar o I Concurso Iberoamericano de Composición para Banda de Música “Vila de Ortigueira”, un certame que nace coa colaboración de máis dun cento de orquestras e formacións de ata 12 países. O galardón carece de dotación económica pero a peza gañadora será interpretada por todas as bandas e orquestras colaboradoras que enviarán ao compositor un certificado de estrea da peza nos seus respectivos países e localidades. O prazo de envío está aberto ata o 12 de marzo deste ano.
Máis información en Concello de Ortigueira
O IGAEM potencia a distribución e a produción nas axudas para o sector escénico e musical
Xénero: | 9 / 1 / 2008
O vindeiro luns 14 sairá publicada a convocatoria das axudas para o sector escénico e musical, pero o boletín e-scena do Instituto Galego das Artes Escénicas e Musicais avanza algúns datos. En primeiro lugar, que esta entidade destinará 2.120.000 euros a promover o sector, o que supón un 35% máis con respecto á última edición. O incremento afecta, sobre todo, á creación e a distribución, o que incide na idea apuntada en varias ocasións desde a Consellaría de Cultura de fomentar a produción de danza, teatro, música e maxia e buscar novas vías para mover os espectáculos. Outra das novidades pasa pola introdución de elementos correctores nos baremos e que toda a documentación será valorada por tres comisións. Ademais, as axudas a investigación e estudo desaparecen en favor da formación especializada. Todo isto engádese ao xa anunciado “Crédito-Cultura”.
Máis información no boletín e-scena (en pdf) e nesta nova o Crédito Cultura
Publícase o concerto de fin de carreira do primeiro gaiteiro titulado superior
Xénero: | 8 / 1 / 2008 + AUDIO + IMAXES + VIDEO
Xosé Luís Miguélez é a día de hoxe o primeiro gaiteiro titulado superior en Música Tradicional de toda a península, esta honra acadouna no 2006 despois de ser un dos primeiros en cursar esta titulación no Conservatorio Superior de Música de Vigo e de dar en novembro de 2006 o seu concerto de fin de carreira no Auditorio do devandito centro. Ese concerto é o que agora recolle nun disco gravado ao vivo e que titula “Esperanza”. A editorial Dos Acordes edita agora este CD que presenta un novo repertorio para gaita galega, baseado en composicións que van, dende a música inspirada na tradición, ata unha linguaxe máis contemporánea. O disco conta coas colaboracións de Lucía Martínez ou Pablo Diago entre outros e nel preséntanse composicións inéditas, algunhas delas estreadas para a ocasión, de músicos como, Ernesto Campos, Ricardo Courtier, Xan Míguez, Paulo González, David Bellas ou o propio Miguélez. Na súa faceta como saxofonista Xosé Luís, que ten un longo percorrido formativo, é tamén un dos novos valores do jazz do país.
Máis información no sitio de Xosé Luís Miguélez
Caixa Galicia e Cultura crean unha liña de créditos para que as compañías fagan os seus espectáculos
Xénero: | 7 / 1 / 2008
“Crédito cultura” é a última iniciativa presentada pola Consellaría de Cultura para promover a industria do espectáculo. A través de Caixa Galicia as empresas galegas poderán acceder a un crédito con condicións especiais para a produción e distribución de espectáculos, así como traballos discográficos. A nova proposta incorpórase á liña de axudas establecida pola Consellaría de Cultura para este 2008 e inclúese dentro das medidas para facilitar a consolidación dun tecido empresarial competitivo.
Máis información no web do IGAEM
Phantom Club presentan o seu disco co que inician xira en xaneiro
Xénero: | 28 / 12 / 2007 + IMAXES + VIDEO
A derradeira presentación discográfica do 2007 corre a cargo dos vigueses Phantom Club co seu EP “Funksiona!”. O disco, de produción independente, esta editado no selo Elisong Producciones e gravado nos Estudios Océano de Vigo. “Funksiona!” preséntase este venres 28 ás 12 horas no Hotel NH de Vigo e á noite cun concerto aberto na sala La Fábrica de Chocolate Club. Sete temas de rock e funk enchen este EP do que se distribuirán 2000 copias e que conta coas colaboracións de outros músicos alleos á banda como Javier Vargas, que estará na presentación, o arxentino Claudio Gabis e o rapeiro californiano Keyd, de Snoop Dog. Phantom Club formouse en 2002 e os músicos que integran a banda teñen as súas raíces en Tui, Vigo e Buenos Aires. O grupo comezará a súa xira de presentación no mes de xaneiro por Portugal volvendo en febreiro a terras galegas e continuando polo resto do Estado. A xira rematará en novembro en Buenos Aires.
Máis información en Phantom Club
Caixa Galicia e a discográfica Casa Limón organizan na Coruña un festival de música do mundo
Xénero: | 26 / 12 / 2007
Será no verán do 2008 e pretende achegar a artistas de estilos musicais como o jazz, flamenco, blues, tango e ritmos procedentes de África e Asia. Falamos dun “Big World music” que a Fundación Caixa Galicia e a discográfica Casa Limón teñen previsto organizar no próximo verán. De momento, ambas entidades non precisaron máis información, pero aseguraron que queren convertelo nunha referencia como o son o de “Vitoria ou Cartagena”.
Máis información en La Voz de Galicia e en La Opinión
Os Premios Maketón poñen nome ao mellor da música viguesa no 2007
Xénero: | 21 / 12 / 2007
Trinta candidaturas aspiran a facerse mañá cun dos cinco galardóns da 7ª Edición dos Premios da Música MAKETON ESTRELLA GALICIA que se coñecerán o sábado 22 en La Fábrica de Chocolate de Vigo. Cada un dos cinco proxectos propostos a cada unha das cinco categorías establecidas, desenvólvense en Vigo e a súa área Metropolitana como premias indispensable para a candidatura. Os internautas propuxeron candidatos e votaron a través do sitio web do programa radiofónico local de Los 40 entre o 1 e o 19 de decembro. Dentro das categorías de Mellor Maketa, Mellor Directo, Mellor Produtor, Mellor Disco e Premio á Traxectoria Musical só a candidatura de Juan Rivas se repite nestas dúas últimas categorías. Outros nomes coñecidos que se barallan como candidatos son Iván e Amaro Ferreiro, Carlos Núñez, Austria, Cornelius, Nadadora ou Pacífico. Este grupo, xunto co grupo CeoDei actuarán durante a gala dos premios.
Máis información en VISADO de Faro de Vigo
Rogelio Groba e Rudesindo Soutelo cobran os dereitos de autor do himno galego oficial
Xénero: | 21 / 12 / 2007
Todo o mundo sabe que o himno galego foi composto por Pascual Veiga en 1890. Pero o que escoitamos nos actos oficiais é a partitura de Veiga arranxada por Rogelio Groba, despois dun encargo que lle fixo Xosé Luís Barreiro en 1985, cando era vicepresidente da Xunta de Galicia (e que figura nos anexos á Lei de Símbolos). Sucede que Rudesindo Soutelo editou eses arranxos en “Arte Tripharia”, a súa editorial, e así o fixeron constar na SGAE. Iso implica que cada vez que se interpreta o himno oficial, tanto Groba como Soutelo, cobran. Rudesindo Soutelo, nunha entrevista realizada por este medio en 2003, explicou que os ingresos pola interpretación do Himno van entre 3.000 e 6.000 euros anuais porque “aínda que se interprete moito, non se declara”.
Máis información en La Voz de Galicia e sobre os dereitos na nosa hemeroteca. Ademais, consulta o noso tema sobre o himno
A Caricia da Serpe presenta o seu segundo disco “O Sorriso do Diaño”
Xénero: | 20 / 12 / 2007
A música de A Caricia da Serpe é difícil de clasificar, blues de Nova Orleáns, pop, rock, reggae, flamenco, referencias a bandas sonoras cinematográficas, cancións populares revisadas e tangos, e sempre cun marcado carácter literario. Co novo disco “O Sorriso do Diaño”(Wonderland) A Caricia da Serpe cumpren 10 anos da súa formación como banda e neste novo traballo presentan doce temas que inclúen poemas e cancións escritos por Lino Braxe e musicados por Rómulo Sanjurjo e Miguel Ladrón de Guevara. Con respecto ao seu anterior traballo “A caricia da Serpe” (Wonderland, 2005) a banda aposta moito máis pola música orixinal e ofrece menos versións que noutras ocasións. En canto ós contidos, o grupo, tenta achegarse aínda máis ás preocupacións sociais. O traballo será presentado o venres, 21 de decembro na FNAC de A Coruña e o xoves, 27 o Teatro Rosalía de Castro da mesma cidade será o concerto de presentación.
Máis información en MeGA sobre A Caricia da Serpe
Debut dunha cantante con 82 anos de “xuventude acumulada”
Xénero: | 19 / 12 / 2007 + IMAXES + VIDEO
A Señora Carmen, compoñente do grupo Malvela, debuta en solitario con “Na flor dos meus anos” (PAI Música) arroupada por colaboracións tan importantes como as de Dulce Pontes, Xosé Manuel Budiño, Uxía ou Rodrigo Romaní no eido musical e os textos do escritor Fran Alonso no libro que acompaña ao disco e no que dá conta da vida desta muller singular. Co grupo Malvela, que xurdiu a partir dun cursiño de cantos populares dirixido pola cantante Uxía, a Señora Carmen presentou este mesmo ano o seu terceiro disco “Da miña xanela á túa” (PAI Música) conseguindo unha grande aceptación con numerosos concertos dentro e fóra de Galicia. O carisma e paixón musical desta muller fixo que pronto os produtores se fixasen nela para a elaboración dun disco propio. "Na flor dos meus anos" componse de 12 pezas de corte tradicional cheas de sentimentos nas que conta a súa vida mergullándose na Galicia que viviu de nena. Ademais do CD e o libro o paquete complétase cun DVD cun documental sobre a vida desta muller e varios vídeos das cancións así como da gravación nos estudios Casa de Tolos. O disco presentarase este venres, 21 de decembro, ás 12:00 horas no CGAC de Santiago.
Máis información en MeGA de Malvela