CORREO
RSS
Noticias
O Cuarteto Caramuxo de Salvaterra gaña o certame Festival Folk Cancioneiros
Xénero: | 14 / 3 / 2008
A orixinal proposta dun cuarteto formado por seis músicos alzouse con premio do Festival Folk Cancioneiros convocado pola Fundación Barrié de la Maza. O Cuarteto Caramuxo de Salvaterra do Miño, integrado por catro clarinetistas, acordeón e percusión, acadou a unanimidade do xurado, que valorou a súa orixinalidade, a coidada posta en escena e a calidade do tratamento dos temas procedentes do Cancionero Gallego e do Cancionero Musical de Galicia, editados pola Fundación Barrié. Os gañadores recibirán un premio de 6.011 euros, a gravación dun disco e a participación no concerto que ofrecerá a Fundación Barrié o vindeiro 17 de maio no auditorio de Palexco, compartindo escenario con Milladoiro. O xurado tamén propuxo á Fundación Barrié facer unha mención especial, pola calidade dás súas propostas musicais, das formacións finalistas Covalblú, Jacobo de Miguel & Pedro Lamas e Quenda Folk.
Uxía Senlle presenta en concerto o seu novo disco en Compostela
Xénero: | 14 / 3 / 2008
Con “Eterno navegar” Uxía Senlle, máis coñecida só por Uxía, presentou o seu quinto disco en solitario esta semana aos medios e mañá fará o propio ao público en xeral. Composicións de letra e música propias mestúranse con interpretacións sobre poemas de Celso Emilio ou Curros Enríquez. No seu espectáculo estarán presentes, de igual xeito que no disco, a poesía, a fotografía e outras linguaxes de expresión artística. O álbum gravouse en Sintra (Portugal) e para el contou con diversas colaboracións como a de Paulo Borges, Ugía Pedreira, Guadi Galego, Quim Farinha, Anxo Pintos, Manecas Costa, Filipa Pais e Rui Veloso entre outros. Durante a actuación deste fin de semana no Ciclo Sons da Diversidade de Compostela, Uxía estará acompañada por algúns destes colaboradores. En “Eterno Navegar” a voz de Uxía percorre camiños de sonoridades atlánticas e ritmos africanos, partindo da tradición e das atmosferas da súa orixe. O disco está editado pola discográfica francesa Harmonía Mundi.
A cultura galega en París homenaxea o gaiteiro Ramiro Rodríguez
Xénero: | 14 / 3 / 2008
O 78 aniversario de Ramiro Rodríguez vai ser moi especial. Este gaiteiro, integrante do grupo Aires da Terra, leva máis de cincuenta anos difundindo a música tradicional galega en Francia. Un feito polo que a Casa de Galicia en París, o Centro de Estudos Galegos da Universidade da Sorbona e o Círculo Cultural Galego da capital parisina lle renderán unha homenaxe este sábado.
Unha exposición permanente amosa en Lugo 400 instrumentos tradicionais
Xénero: | 13 / 3 / 2008
O Centro de Artesanía e Deseño que depende da Deputación Provincial de Lugo abre esta tarde unha exposición permanente sobre música tradicional. Na mesma pode verse unha selección de 400 instrumentos entre os que hai mostras do século XVIII que constitúe, segundo Lara Méndez, vicepresidenta desta institución, “a única exposición de instrumentos musicais catalogada e baseada en criterios científicos que existe en Galicia”. Segundo explicou a responsable, este catálogo quere servir como base para futuras investigacións e análises do patrimonio musical.
Abe Rábade reivindica a actualidade de Rosalía en chave de jazz
Xénero: | 11 / 3 / 2008 + AUDIO + IMAXES
Desde hoxe estará nas tendas o disco “Rosalía 21” (Falcatruada) saído do espectáculo multimedia co mesmo nome que se presentou no Teatro Mella da La Habana o pasado 23 de febreiro. O espectáculo, dirixido musicalmente por Abe Rábade e literariamente polo poeta Anxo Angueira, proporciona unha visión contemporánea da poesía de Rosalía de Castro (1837 – 1885). O disco conta con dez temas con textos da poeta compostelá e un corte extra cun fragmento do prólogo de Cantares Gallegos. A declamación dalgunhas das obras de Rosalía na voz de Angueira vaise mesturando coa música en chave de jazz composta por Rábade e a poesía cantada por Guadi Galego. O proxecto procura “unha renovación estética da temática rosaliana adaptada aos novos tempos:melodía, timbre, harmonía e ritmo.” No disco participan Abe Rábade (piano e composición), Anxo Angueira (voz recitada), Guadi Galego (voz), Jesús Santandreu (saxo tenor), Nelson Cascais (contrabaixo) y Bruno Pedroso (batería).
O Xacobeo programa un festival para as localidades polas que pasa o Camiño de Santiago
Xénero: | 11 / 3 / 2008
Dez localidades do concello de Lugo polas que transcorre algunha das variantes do Camiño de Santiago (Camiño do Norte, Ruta Primitiva ou Francesa) estarán de festa no meses de xullo e agosto. Isto é posible grazas a “Artes do Camiño”, o festival que impulsa a Sociedade Anónima de Xestión do Plan Xacobeo. Un evento que engloba máis de sesenta actividades entre teatro concertos, poesía, danza ou luthería e que ten un orzamento de 380.000 euros. O violinista Benjamin Kreith, o frautista Carlos Cano ou o bailarín Jurik Kondraj son algúns dos artistas que formarán parte deste festival.
O IGAEM publica os datos definitivos da Rede Galega de Música ao Vivo do 2007
Xénero: | 10 / 3 / 2008
Setenta e cinco grupos ou solistas percorreron o país durante o 2007 actuando en corenta e oito salas ao abeiro do programa da Rede Galega de Música ao Vivo no que o erario público corría con parte dos gastos do pago aos artistas. O boletín e_scena do IGAEM publica no seu número de marzo os datos dos resultados en funcións, facturación e asistencia. O balance total é de 798 funcións, unha facturación de 94.181 euros e máis de 37.000 persoas asistindo aos concertos. As cifras detalladas debullan significativas diferenzas de éxito entre as diferentes propostas e salas. Así o grupo que conseguiu unha mellor facturación por concerto foi a formación feminina Faltriqueira que acadou unha media de 387,70 euros, séguena os grovenses Nadadora e Dios Ke te Krew con algo menos de trescentos euros de media. No outro lado do espectro sitúanse os solistas Xoán Curiel e Diego Massimini con 38,10 euros e 40 euros de media por concerto respectivamente. Desde o lado das salas tamén pode verse que foron a Sala Aturuxo de Bueu e a Sala Ache de Marín as mellor paradas cunha media de 298,30 euros e 228,68 euros de facturación media por concerto, mentres que a Sala Badulake de Ordes foi a que menos recadou cunha estimación de 24,60 euros por concerto. No que a asistencia se refire o Forum Celticum de Culleredo conseguiu unha media de 132,72 espectadores por concerto, a cifre máis alta en contraposición aos 15, 53 de La casa de Arriba en Vigo. A ocupación media das salas foi do 35,92 por cento.
Santiago e Vigo celebran a Semana Santa con senllos programas musicais
Xénero: | 10 / 3 / 2008
Chega a Semana Santa e os concellos de Santiago e Vigo acaban de presentar a súa programación musical para estas datas festivas. Santiago organiza a terceira edición do Festival de Músicas Contemplativas, co que o Consorcio pretende abrir o patrimonio eclesiástico que restaura como sede para varios concertos. Pola súa banda, baixo o título “O misticismo nas culturas europeas” comeza a oitava edición do Ciclo de Música Sacra que organiza o concello de Vigo. Tres grupos estranxeiros e un galego integran un cartel que se desenvolve sempre no mesmo espazo, a igrexa de María Auxiliadora.
O novo de Iván Ferreiro poderá descargarse da rede antes da saída en tendas
Xénero: | 6 / 3 / 2008 + VIDEO
O vindeiro día 13 de marzo Iván Ferreiro comeza xira co seu disco “Mentiroso, mentiroso” aínda sen saír ás tendas, pero cunha expectación máis que segura. Así o demostra o feito de que xa estean esgotadas as entradas para dous dos seus concertos máis importantes, en Madrid e Barcelona, o que xa motivou a ampliación dun concerto máis na capital española. “Mentiroso, mentiroso” estará nas tendas o vindeiro 25 de marzo aínda que o músico ofrece aos seus seguidores a posibilidade de descárgalo esta fin de semana da súa páxina web ou escoitalo íntegro nela. A xira de Iván Ferreiro chegará a Galicia o día 23 de maio, ao Pazo da Cultura de Pontevedra, sendo Lugo e Santiago as súas seguintes paradas en xuño. O grupo Stereotipos, gañadores da primeira edición do certame Nova Xove Music, acompañará a Ferreiro na xira española.
Comeza a xira do musical “Galleciae” que mestura tradición galega coa sinfónica
Xénero: | 6 / 3 / 2008
A soprano Susana de Lorenzo, o tenor Alberto Cunha, o grupo folk Liorna, as cantareiras e o grupo de baile da agrupación “Trompo ós pés” mais a Orquestra Sinfónica de Melide son os artistas que participan en “Galliciae”, un variado espectáculo musical galego. Malia que a obra se estreou o pasado mes de agosto, agora comeza a xira que a levará por Santiago, Ferrol e A Coruña.