CORREO
RSS
Noticias
O vigués Slowlee lanza novo disco cheo de colaboracións
Xénero: | 13 / 3 / 2009 + VIDEO + AUDIO
Logo de Chupado (2004), o vigués de nacemento e vilagarcián de adopción Rafael Lago, "Slowlee", chega ás tendas con Cojo aire (Animal Crackers Rec. 2009). No medio entre os dous discos puxo o seu gran de area en varios traballos colectivos como Hipspano-Los Pesos pesados del hip-hop en español de todo el mundo. Nos 18 temas do novo disco deste artista afonda no estilo hip hop e R&B e atrévese a explorar os sons do soul. A proposta chega cargada de colaboracións coñecidas coma, Gran Purismo, Dani Ro, El Pillo Astuto, Sentinel ou o galego Solemne, e conta con The Zombeats na produción. Entre os seus proxectos actuais, ademais deste lanzamento, está centrarse na produción para artistas de R&B e Hip Hop do panorama nacional e internacional colaborando co grupo de produtores e escritores de Atlanta "The Clutch".
Arranca en Culleredo o ciclo Grandes coros de ópera
Xénero: | 13 / 3 / 2009
A Antiga Universidade Laboral de Culleredo acollerá esta noite un concerto singular no que participarán uns 180 músicos. As corais polifónicas El Eco de la Coruña, o Liceu Casino de Vilagarcía e a Orquestra Sinfónica de Melide ofrecerán a primeira dunha serie de galas líricas que interpretarán pezas de Verdi como Nabucco, Aída, Il Trovatore, La Traviata ou Macbeth. O proxecto chámase Grandes Coros de Ópera, e con el a Sinfónica de Melide pretende estender a actividade musical á provincial. A Coruña, Ferrol e Santiago son algunhas das localidades polas que xirará o espectáculo que conta cunha achega de 65.600 euros da Deputación da Coruña.
A OSG interpreta a primeira obra sinfónica de Sergio Moure
Xénero: | 12 / 3 / 2009
É máis coñecido por ser compositor de cinema. Foi o autor das bandas sonoras das longametraxes Cargo ou Inconscientes (pola que foi candidato ao Goya), pero agora Sergio Moure estreáse como compositor sinfónico. A Orquestra Sinfónica de Galicia (OSG) interpreta este venres a súa obra Admonitum coas voces solistas da mezzosoprano Ainhoa Zubillaga, do tenor Gustavo Peña e do barítono Josep Miquel Ramón.
Quant enchen de cores e idiomas o seu primeiro disco longo
Xénero: | 9 / 3 / 2009 + AUDIO + VIDEO
Con catorce cancións e tres videoclips aparece o primeiro longa duración dos ferroláns Quant, que poderá mercárselles directamente a eles (5 euros máis gastos de envío) ou descargalo de balde a través da plataforma A Regueifa. Segundo informa o magazine SONO-TONE, o disco New Adventures in full colour(2009) agrupa temas xa coñecidos a través de anteriores EPs, agora re-gravados e re-masterizados, xunto con temas novos. No disco do cuarteto hai 10 temas cantados en inglés, un en francés, un en galego e dous en castelán. Todas as cancións compostas enteiramente por OscarQuant agás a que abre o disco Hey, mrDJ, please,Drop the neddle!!!! (música: Alberto, letra: Óscar) e Looking for the magic por Dwight Twilley. Como xa é marca dos Quant o son segue o estilo surfeiro da onda sixties. O disco sae á venda comercialmente en formato CD baixo licenza Copyleft no que inclúen os tres videoclips que teñen realizado ata agora.
O Consorcio de Santiago presenta a cuarta edición do festival de Músicas Contemplativas
Xénero: | 4 / 3 / 2009
Os concertos de música sacra en espazos históricos xa son un clásico da Semana Santa compostelá. Desde hai catro anos, o Consorcio de Santiago organiza estas actividades baixo o nome de Músicas Contemplativas. Para este 2009, o festival achegará sons procedentes de países como Italia, Irak, Arxelia, Francia ou o Líbano nese obxectivo de fortalecer o diálogo intercultural. En canto aos espazos, a igrexa e o claustro de San Francisco, o convento do Carme, a Capela Real do Hostal e as igrexas de San Martín Pinario, San Fructuoso, Santa Clara, San Agustín e Ánimas son os recintos habilitados nesta cuarta edición.
Música de deseño
Xénero: | 4 / 3 / 2009
Estamos afeitos a ver nas listas de éxitos internacionais grupos creados ad hoc polas discográficas para atender a segmentos concretos de mercado. Ata o de agora, este fenómeno era descoñecido en Galicia. Pero xa está en marcha Azou, un proxecto que integra espectáculos de música e baile en directo, unha serie de animación, mercadotecnia e, por suposto, música, coa intención de chegar ao público adolescente do noso país.
Wöyza presenta o seu primeiro disco editado en vinilo
Xénero: | 3 / 3 / 2009 + VIDEO + AUDIO
Wöyza, artista de HipHop, Soul e R&B, (Moaña 1984) de raíces uruguaias e crecida en Vigo acaba de sacar á luz, baixo as producións de El Puto Coke, o seu agardado primeiro disco Pisando el suelo que ves, onde amosa a través de trece temas, un deles en galego, a capacidade do seu rexistro, harmonía de voces e estruturas diferentes. Cun concerto no Festival Intercultural do campus de Ourense o día 11, e xa o día 14 ante o seu público vigués na Sala A!, Wöyza presentan en directo este disco que en formato vinilo xa pode mercarse a través de Licor Kafé e en formato dixital está dispoñible desde outubro na súa propia web na que calquera usuario pode descargarse de balde o álbum. Con claras influenzas soul eo disco conta en dous temas coas colaboracións de Kesia e Dani Reus, candidato ao Grammy en dous ocasións no apartado de Gospel.
Los Planetas encabezan o avance do cartel do Festival do Norte 2009
Xénero: | 26 / 2 / 2009
As noticias sobre como será a edición deste ano do FDN van chegando aos poucos. No avance do cartel de actuacións previstas para o 1 e 2 de maio a organización xa comunicou a presenza de Los Planetas, os holandeses The Rumble Strips, Love of Lesbian, La Buena Vida, Manos de Topo, Cuchillo , os coruñeses Nouvelle Cuisine e máis Isra Dj ( Sala Karma de Pontevedra). Tamén como última hora súmanse as confirmacións de The Whip, Vetusta Morla e Extraperlo. Quedan moitos grupos por confirmar así como os horarios de actuación pero para que aqueles que confían plenamente neste evento xa está á venda as entradas a través do servizo en liña de Caixanova a un prezo especial de 20 euros o abono de dous días se a compra se fai antes do 15 de marzo. Por outro lado xa se coñece o gañador do concurso Artwork para decidir a imaxe do festival deste ano en todo tipo de mercadoría derivada, resultando elixido o concepto presentado por Guillermo Arias, deseñador nacido en Ribadavia e residente na Coruña onde ten o estudio SysVisions.
Uxía gaña o premio á mellor canción en galego na XIII edición dos Premios da Música
Xénero: | 26 / 2 / 2009
Nin Deluxe nin Iván Ferreiro. Ambos os dous competían na categoría de mellor álbum de pop alternativo da XIII edición dos Premios da Música. Sen embargo, o gañador foi Vestusta Morla por Un día en el mundo, un dos grandes vencedores nesta ocasión ao conseguir os tres premios nos que era candidato. Canda ao sexteto madrileño, Amaral e Nena Daconte foron os conxuntos que máis galardóns conseguiron. No apartado de mellor canción en galego, a vencedora foi Uxía con Rumores de falúas. Os premios entregaranse o vindeiro 12 de marzo no pazo de congresos Manuel Rojas de Badaxoz.
O instrumentista Pancho Álvarez presenta Sólidos Galicianos
Xénero: | 25 / 2 / 2009
O terceiro disco do multiinstrumentista porriñés Pancho Álvarez está xa dispoñible para mercar en formato dixital, previamente á distribución do CD a través da tenda en liña de PAI Música. Sólidos Galicianos é o primeiro disco que Álvarez edita con PAI Música e nel ofrece trece pezas coas que o artistas se mergulla nos ritmos galegos para atopar diferentes sonoridades. O artista, especialista en instrumentos de corda, deuse a coñecer como violinista do grupo “Na Lúa” a comezos dos 80 formando parte despois do grupo Matto Cóngrio e da formación de acompañamento e gravación de Carlos Núñez. O seu anterior disco en solitario foi Nas Cordas, publicado en 2001 con BOA. O título deste novo traballo fai referencia a unha moedas acuñadas na época do antigo Reino de Galicia.