CORREO
RSS
Noticias
A 37 edición do Festival de Música de Lugo programa música para bebés
Xénero: | 24 / 4 / 2009
Hoxe comeza na igrexa lucense de San Pedro a XXXVII edición da Semana do Corpus integrado no Festival de Música Cidade de Lugo. Un encontro que este ano conta, como principal novidade, dun concerto para bebés (de entre 0 e 3 anos) que interpretará pezas do período barroco mesturadas con músicas populares ademais de cantos de berce. Canda isto, os 18 concertos que compoñen o programa desta ocasión prestan especial atención aos compositores Purcell, Hayden e Händel. Todas as actividades serán de balde e desenvólvense en diferentes escenarios da cidade das murallas.
A Real Academia de Belas Artes homenaxea a Milladoiro
Xénero: | 23 / 4 / 2009
A coincidir cos trinta anos do nacemento de Milladoiro, a Real Academia de Belas Artes Nuestra Señora del Rosario, da Coruña fará este sábado un acto de homenaxe a este grupo. A institución quere destacar así o traballo a prol da recuperación e da reinterpretación da música tradicional que desenvolveu a formación ao longo das últimas tres décadas. O acto desenvolverase na sede da Academia na Praza do Pintor Sotomayor o vindeiro sábado 25 de abril a partir das sete e media da tarde.
Juan Rivas trae o calor atlántico con Superdiscotropical
Xénero: | 22 / 4 / 2009 + VIDEO
O disco co que volve Juan Rivas pode descargarse de balde da rede durante esta semana, ao mesmo tempo que consegue un lugar nas portadas española e mexicana do portal My Space. Dous anos despois de Mundo Feliz (POP&CO, 2007) Rivas enche o disco de calor tropical desde o propio título do álbum ata os das cancións, Por ahí viene el sol, Verano en Portugal, Elis Regina y el farfisa que vino de París son boas mostras deso. Esa calor tamén chega co seu característico son caloroso, festivo e elegante, un lounge a pé de praia con influenzas descaradas de bossa nova, drum&bass e como sempre un pop fresco e limpo. Para a gravación Juan Rivas decantouse esta vez polo traballo máis artesanal facéndoa el mesmo desde o seu estudio caseiro e conta coas colaboracións de outros músicos como Joao Parahyba, do brasileiro Trio Mocotó, Jose Luis Pardo, de Amigos Invisibles, un compoñente do grupo barcelonés Electrocugat ou Peón Kurtz de Def con dos, entre outros.
Ghaita de pedra presenta Nekiño, o seu primeiro álbum
Xénero: | 22 / 4 / 2009
Nekiño é o título do primeiro álbum do grupo folk lucense Ghaita de pedra. O disco autoeditado preséntase ao público cun concerto gratuíto o vindeiro vinte e cinco de abril. Será a partir das oito e media da tarde no auditorio Gustavo Freire de Lugo, e contará coa presenza de convidados coma Anxo Pintos, Begoña Riobó, Julio Abal ou Iván Costa. O grupo, fundado en 2001, está formado por José Varela, Lourdes Armesto, Pablo Condo, Luis Rodil e Xavi Fernández, e nas súas cancións reinterpretan temas tradicionais con influencias das músicas irlandesa e do leste de Europa.
A Coral de Ruada celebra noventa anos cun feixe de iniciativas
Xénero: | 21 / 4 / 2009
O 24 de xuño de 1919 nacía en Ourense a histórica Coral de Ruada. A formación celebra agora os seus noventa anos cun bo feixe de actividades que se desenvolverán ao longo de todo o ano da man da discográfica Ouvirmos. Por unha banda, o selo reeditará o libro que recolle a viaxe que o coro fixo por Andalucía en 1927 e recuperará as primeiras gravacións da formación nun disco conmemorativo. En setembro, o edificio Simeón de Ourense acollerá unha mostra na que se poderá contemplar o traballo gráfico de diferentes creadores arredor de Ruada, así coma un documental sobre a traxectoria do grupo e diferentes contidos didácticos. Visitas guiadas e mais a celebración do III Certame Internacional de Coros De Ruada no mes de xuño completan o programa previsto.
Especializarse para sobrevivir
Xénero: | 21 / 4 / 2009
Eran os lugares por excelencia para adquirir música, pero en cousa dunha década, practicamente a metade das tendas de música de Galicia desapareceron. Entre as que resisten, atopamos unha boa cantidade de establecementos veteráns, que en moitos casos atopan na especialización o xeito de se manter con vida. Analizamos canda a eles a situación e as perspectivas dun sector que pode ser exemplo para outro tipo de comercios culturais.
Versos con ondas
Xénero: | 20 / 4 / 2009
A poesía toma o aire. Nas últimas semanas saíron á rúa tres obras de moi distinto carácter nas que se integra a lírica coa música. O último poemario dun autor consagrado coma Manolo Rivas comparte espazo nos andeis co debut neste campo da betanceira Gabriela Rodríguez. Canda a eles, Ouvirmos inclúe, na Fotobiografía Sonora de Avilés de Taramancos as versións musicadas que de poemas deste autor fixo Rodrigo Romaní. Tres aproximacións diferentes ao fenómeno dos versos con ondas.
A ciber-verbena de GalegoZ reafírmase no terceiro disco da banda
Xénero: | 16 / 4 / 2009 + AUDIO
GalegoZ comezaron a facerse notar no 2006 co seu primeiro disco Galician Chimpanzee editado por Ouvirmos. Despois viñeron Revolution Dance, tamén editado con Ouvirmos en 2007 e finalmente presentan a súa consolidación definitiva como proxecto musical con este Viñeron da Galiza interior que con produción propian editan a través do selo A Regueifa Plataforma. Fieis ás súas consignas musicais e reivindicativas GalegoZ afondan no seu Aranhoto Style nestes cinco novos temas nos que as bases electrónicas e sampleados fusiónanse con elementos do funk, reggae e a máis ecléctica das seleccións musicais combinada con letras combativas buscando mover mente e corpo ao mesmo tempo nunha ciber-verbena. A banda Galegoz está formada por: Marcos Payno (voz ), Denís Mutante (voz), Pulpiño Viascón (batería, percusións e voz), Manuel Payno (trompeta e coros), Alex Salgueiro (frauta traveseira e teclado), Tomás Ruído (Técnico de son ) e Matías Olazábal (guitarra), ademais das colaboracións de membros do Colectivo Perverso.
Pepe Vaamonde Grupo busca as súas raíces autoeditando o seu terceiro disco
Xénero: | 15 / 4 / 2009 + VIDEO
Durante os últimos días do presente mes de abril, o que será o terceiro traballo discográfico de Pepe Vaamonde Grupo Introterra estará dispoñible nas principais tendas de discos de Galicia. O disco gravouse entre os Estudios PKO de Madrid, Estudios Bruar da Coruña e Metrópolis de Vigo. Introterra está autoeditado pola banda e distribuído por Lonxa Cultural, nel reúnese, de xeito condensado, a esencia da banda. Pepe Vaamonde Grupo inicia estes días unha pequena xira promocional por terras galegas que os levará a actuar, nas próximas semanas, nas cidades de A Coruña, Pontevedra, Santiago de Compostela e Lugo, comezando o vindeiro venres 17 de abril, no Forum Metropolitano de A Coruña (Rúa Río Monelos s/n). En Introterra ofrece 11 temas cos que resumir, de xeito conciso, o que é a traxectoria e o estilo da propia formación nestes últimos 8 anos e ollando, de xeito claro, cara ás raíces da mesma.
A Coruña acollerá a primeira mostra de videoclips
Xénero: | 6 / 4 / 2009 + DOCUMENTO
Video Killed the Radio Star foi o primeiro videoclip emitido pola MTV a principios de agosto de 1981. Esta peza da historia audiovisual da música dálle nome á primeira mostra de videoclips Cidade da Coruña, que se celebrará entre o 29 de xuño e o 4 de xullo. Polyrock, entidade organizadora deste certame, centra o evento no panorama musical e audiovisual galego declarándose “conscientes da existencia da gran cantidade de obras que merecen saír á luz na nosa comunidade”. Dacordo coas bases poderán presentarse pezas realizadas entre os anos 2007 e 2009 como complemento de traballos discográficos de selos independentes, ou ben producidas directamente polos músicos. Co único condicionante de que estes sexan galegos, ou cun mínimo da metade dos membros da formación de orixe galega. A mostra contará cun circuíto de proxección nocturna en diferentes locais de lecer da cidade. O prazo de recepción de traballos (en DVD ou AVI e de menos de 10 minutos de duración) está aberto ata o 8 de maio.