CORREO
RSS
Noticias
Zënzar desembarca no festival de Vila de Cruces con A Tribu
Xénero: | 7 / 8 / 2009
Os de Cerceda levan vinte anos dándolle enerxía ao panorama musical galego e agora están a presentar por todo o país o seu máis recente traballo A Tribu despois de adiantalo en numerosos medios de comunicación e nun concerto o pasado 2 de maio. O disco, autoeditado pola banda, é un traballo sobre todo roqueiro pero coma sempre con arroutadas punkies, heavies e tradicionais. Gravado e co-producido por Javier Abreu e Zënzar nos estudios Océano de Nigrán. Contan coa colaboración de Vituco Neira (Ruxe Ruxe), Xurxo Souto (3 Trebóns), GendeBeat, María X.Silvar (Chámalle Xis), os percusionistas Manolo Suárez e David Bolaño así como o gaiteiro José M. Ares. Hoxe mesmo levan estes catorce temas ao festival de rock de Vila de Cruces onde compartirán escenario cos grupos NAO, esquíos e Pipas Group. Este é o quinto disco do grupo, malia ter un anterior baixo o seu nome orixinal como Mördor.
A Real Banda de Gaitas de Ourense viaxará por China difundindo a súa música
Xénero: | 6 / 8 / 2009
Caixanova e a Real Banda Escola Provincial de Gaitas de Ourense veñen de subscribir un convenio de colaboración que permitirá á agrupación ourensá difundir o coñecemento da gaita, como instrumento destacado do folclore galego, nunha serie de concertos que ten previsto realizar por diversas cidades de China. Na sinatura do convenio estiveron presentes o director da banda, Xosé Lois Foxo, e Amadeo Rodríguez Piñeiro, director de Relacións Institucionais de Caixanova en Ourense.
Música, arte e deporte únense na novena edición do Marisquiño
Xénero: | 6 / 8 / 2009
¿Que ten que ver o marisco coa cultura urbana? Posiblemente nada, pero Vigo acolle desde hai nove anos baixo o nome de O marisquiño a un festival que une música (este ano está a Mala Rodríguez), arte (o grafiteiro vigués Nano 4814 axitará os seus esprais nun mural de 25 metros) e diferentes deportes urbanos: skate, breakdance, descensos en bicicleta de montaña pola cidade... O encontro terá lugar esta fin de semana (8 e 9 de agosto) en Vigo aínda que tamén se poderá seguir pola rede. Ademais, a organización ofrecerá información en tempo real para os visitantes vía Bluetooth, ademáis dos códigos BIDI (códigos bidimensionais para usuarios da rede 3G).
A Real Filharmonía celebra o oitenta aniversario de Rogelio Groba cun concerto
Xénero: | 4 / 8 / 2009
Os compositores Joaquín Rodrigo, García Abril ou Rogelio Groba comparten o feito de que asistiron a algunha edición do curso Música en Compostela, o programa de formación musical que se celebra desde hai máis de medio século en Santiago. Non é de estrañar que a Real Filharmonía de Galicia aproveite as súas partituras para pechar esta semana a 52 edición deste encontro. A formación ofrecerá dous concertos (martes e xoves, ás 21:00 horas, con entrada libre) que ademais de executar repertorio galego, celebrará que o compositor galego Rogelio Groba cumpre 80 anos.
A canción Boogie Vigo de AÍD é o Tema da semana na sección latina de iTunes
Xénero: | 31 / 7 / 2009
iTunes, a tenda de música máis importante do mundo, escolleu “Boogie Vigo” como “Latino Single of the Week”, o que permitiu que o nome da rapeira de Vigo, con apenas 19 anos, destaque na portada da popular sección latina xunto a artistas consagrados como Nelly Furtado, Bebe, Shakira, Manu Chao, etc. A sección latina de iTunes, cunhas vendas que superan as 4.000 cancións por minuto, ten unha ampla repercusión internacional e permite que millóns de persoas poidan achegarse á súa música. Malia que esta sección non está dispoñible en España, si o está nos países que máis usuarios aportan a iTunes: EEUU, U.K., Australia, Canadá, Francia, Xapón, Holanda e Suíza. iTunes destaca nunha páxina especial dedicada a esta promoción o feito de que AíD emprega nas letras do disco Jugando tanto o castelán como o galego, e que estamos ante unha proposta auténtica, lonxe dos artificios das elaboradas propostas de marketing que dominan a escena musical. Jugando (autoedita-licor kafé, 09) está distribuído en todo o mundo por Lonxa Cultural.
Sae á venda Contratempos de Xoán Rodríguez Proxet
Xénero: | 30 / 7 / 2009 + VIDEO
O proxecto do percusionista Xoán Rodríguez (Raxó, 1971) ven de desembocar no disco Contratempos no que ao seu trío de percusión composto por el mesmo, o tablista hindú Vikas Tripathi e o percusionista galego Noli Torres, engade a colaboración doutros tres músicos e as voces de Tatiana Depestre e Irene Pérez. O disco contén oito temas, catro deles autoría de Xoán Rodríguez, e un vídeo e foi gravado nos días 2 e 3 de abril no auditorio do Conservatorio Profesional de Música de Vigo, no que Rodríguez é titulado na especialidade de percusión completa. O artista edita este Cd baixo o seu propio selo Latin Jazz XRP Records. Os estilos que manexa o Xoán Rodríguez Proxet van desde o jazz e latin jazz a bossa nova pasando polo afro o swing ou o hip – hop tocados con instrumentos de parches.
Cancións para ver
Xénero: | 30 / 7 / 2009
Moito choveu xa desde Fai un sol de carallo e os primeiros videoclips de Os Resentidos e outros grupos da movida. Tamén pasou un tempo desde que o Xabarín Club lle achegase a posibilidade de se expresar a un bo feixe de grupos do noso país. Desde aquela, a creación de videoclips en Galicia foise consolidando en Galicia e amosa na actualidade unha grande forza.
Gravar de cara ao público
Xénero: | 21 / 7 / 2009
Facer da gravación dun disco algo que tamén se comparte co público. Esta é unha proposta que atopamos, baixo dúas fórmulas diferentes, en senllos grupos galegos esta verán. A rachar a fronteira do álbum como produto final, Sumrrá acaba de gravar na NASA o seu terceiro disco e The Homens retransmiten na rede as súas sesións de gravación. Falamos con eles sobre estas iniciativas.
Sae á venda a BSO composta por Sergio Moure para “Un bo home”
Xénero: | 20 / 7 / 2009
A banda sonora orixinal composta polo coruñés Sergio Moure de Oteyza para a longametraxe "Un bo home", ven de saír á venda en CD, editada por JMB/Karonte. A música foi gravada na Coruña coa colaboración da Orquestra Sinfónica de Galicia. Moure ten unha importante traxectoria como compositor para o audiovisual conseguindo candidaturas aso premios Goya e Mestre Mateo par algúns dos seus traballos. Moure tamén fai labores como profesor participando nos Master de Produción Audiovisual da Universidade da Coruña e dirixiu os Seminarios de composición de música de cine da Coruña 2006-2007, organizados pola Deputación provincial e a Fundación Paideia. O pasado 13 de marzo foi a estrea absoluta do seu Concerto nº 1 Admónitum, pola Orquestra Sinfónica de Galicia dirixida por Víctor Pablo Pérez no Palacio da Opera da Coruña. “Un bo home” é unha produción audiovisual con participación galega a través de Milou Films, dirixido por Juan Martínez Moreno o filme estreouse a finais de abril. O compositor está traballando arestora na longametraxe "Retornos", dirixida por Luis Avilés.
Desaparece o programa Banda Curta da TVG
Xénero: | 17 / 7 / 2009 + VIDEO
Despois de oito meses en antena con 27 programas emitidos, “Banda Curta”, o programa de música en directo que se viña emitindo todos os sábados na TVG, non terá continuidade despois do verán. Así o fixo saber hoxe o director do programa, Alfonso Pato, por medio dun comunicado. Músicos como Iván Ferreiro, Coque Malla, Silvia Superstar, Dr. Explosion, Lamatumbá, Christina Ronsenvinge, The Homens, Josele Santiago, Def con Dos, David Fonseca, Ruxe-Ruxe, Ectoplasma, Sugar Mountain, Som do Galpom, Cornelius, Moon Cresta e ata 45 bandas pasaron en directo pola discoteca LP45 de Ordes onde se gravava o programa. Banda Curta era o único formato dedicado en exclusiva á música pop e rock da televisión pública galega.