CORREO
RSS
Noticias
O certame Constantino Bellón celebrarase en novembro
Xénero: | 27 / 10 / 2009
O Teatro Jofre acollerá, os vindeiros días 8 e 9 de novembro a XIX edición do certame de Gaita Constantino Bellón. A implicación do Ateneo e do Concello de Ferrol e mais o apoio da Deputación da Coruña permitirán que o evento se celebre este ano, logo de que a retirada do apoio da Secretaría Xeral de Emigración puxese en perigo o concurso. En total dez gaiteiros competirán polo premio na categoría de gaita solistas. O galardón de composición foi para Jesús Rodil Rodríguez coa obra Lugrís.
Unha delegación levará a música galega ao Womex, unha das feiras máis relevantes do sector
Xénero: | 26 / 10 / 2009
Dez empresas discográficas, dúas asociacións profesionais e representantes da AGADIC (Axencia Galega das Industrias Culturais) teñen unha cita no Womex, a feira de música internacional máis relevante. Será do 28 de outubro ao 1 de novembro e terá un espazo propio baixo a marca Galician Tunes, e cunha estratexia dirixida fundamentalmente aos mercados europeos e latinoamericanos. Este ano teñen confirmada a súa participación no encontro 3.000 axentes acreditados procedentes de 90 países.
Lugo acolle o IV Congreso de Ensinantes de Música Tradicional
Xénero: | 21 / 10 / 2009
A fin de semana entre o 30 de outubro e o 1 de novembro, a Facultade de Veterinaria de Lugo acollerá o IV Congreso de Ensinantes de Música Tradicional. No encontro, ademais das comunicacións dos participantes haberá conferencias sobre cuestións coma o Proxecto Ronsel, o patrimonio lúdico, a introdución dos máis novos no baile tradicional ou mesmo concertos didácticos. Segundo explica a Asociación de Gaiteiros Galegos, que organiza o encontro, o congreso "pretende ofrecer aos asistentes coñecementos e recursos para o ensino da música tradicional nos diferentes ámbitos educativos, pero sobre todo, pretende concienciar da importancia que ten utilizalos". O prazo de inscrición está aberto no web da AS-PG ata o vindeiro día 23.
Un debate e concertos exhibirán na coruña a música improvisada
Xénero: | 20 / 10 / 2009
Os bos resultados recollidos na primeira edición do Festival Fase de Música Improvisada levou aos organizadores a celebrar unha segunda parte. Nesta ocasión o programa conta con dúas partes ben diferenciadas que se desenvolverán na Fundación Luis Seoane. Dunha banda haberá unha xornada de debate (venres 23 de outubro) e dous concertos (sábado 24 de outubro) a cargo do artista vasco Mattin e o músico británico Keith Rowe. Ademáis, a partir deste ano, o Festival Fase para a formar parte da programación de Sinsal como Festival Sinsal extensión Fase.
Os soños de Fuxan
Xénero: | 14 / 10 / 2009
Un ano despois dos dous concertos que reuniron o grupo en Compostela, Fuxan os ventos tiran un novo disco. Terra de Soños recupera en formato Digibook (CD+DVD)os temas que soaron na capital galega. Mentres o CD achega vinte cancións, o DVD recolle, canda a un making of, a totalidade do directo, coa participación de convidados coma Guadi Galego, Ugia, Xavier Díaz ou Mercedes Peón. O proxecto, editado por BOA Music, está xa dispoñible en tendas de todo o Estado, quioscos e Internet. Os membros do grupo sinalaban que continuarán con esta xira cando menos ata 2010, e non descartan emprender novos proxectos no futuro.
Vigo celebra o XII Certame de Improvisación Oral
Xénero: | 9 / 10 / 2009
O Centro Cultural de Valadares organiza para esta fin de semana, entre o 10 e o 12 de outubro, a XII edición do seu Certame Internacional de Regueifas. O Verbum, Casa das Palabra acollerá actuacións de regueifeiros galegos, repentistas cubanos ou novos improvisadores, así coma de cantantes que empregan a retranca nas súas letras.
A Sinfónica comeza o ano Gaos cunha ópera inédita
Xénero: | 7 / 10 / 2009
Amor vedado, a única ópera do compositor galego Andrés Gaos, chegará por vez primeira aos escenarios cando se fan 50 anos do falecemento do seu creador. A Orquestra Sinfónica de Galicia presentaba onte o espectáculo, que se desenvolverá mañá, día oito, no Palacio de Ópera da Coruña a partir das oito e media da tarde. A formación continuará ao longo da temporada con propostas arredor deste creador, e prevé gravar toda a súa obra sinfónica e camerística. Pola súa banda, a Universidade da Coruña centrará en Gaos diferentes actividades no marco das II Xornadas de Divulgación do Patrimonio Musical Galego, que comezan o vindeiro día 13 cunha mesa redonda.
Kings of Convenience abren o Festival Sinsal Outono 2009
Xénero: | 6 / 10 / 2009
Malia a que faltan aínda por fechar algúns grupos e datas, a organización do Festival Sinsal presentou xa un adianto do que achegarán neste outono. Kings of Convenience serán os responsables de abrir a programación o vindeiro 3 de novembro en Vigo. Canda a eles, están confirmadas as presenzas de Bedroom Community (4 de novembro), The Dodos (17 de novembro) e de Emilio José. Antes destes concertos, os días 23 e 24 de outubro a Fundación Seoane da Coruña acollerá unhas xornadas sobre Ruído e Capitalismo. A organización promete máis datos do programa para os vindeiros días e novidades no evento de cara a 2010.
Preséntase na rede o disco A Coruña Son 2009
Xénero: | 2 / 10 / 2009 + AUDIO + VIDEO
Xa está dispoñible para a descarga o disco coa edición definitiva das dez cancións do obradoiro A Coruña Son 2009 organizado polas Concellarías de Cultura e de Mocidade do Concello da Coruña a primeiro deste ano. Os intérpretes cos seus temas son : Sandrísima (canción Tic-Tac), Sergio Zearreta (Fincapé), Fracasados de antemano (Menezes), Pulpiño Viascón (Quérote na praia do Orzán), Magritte (Alpinista), Supersound (Onde estás), Marisol Manfurada (Instinto básico), Maus vizinhos (Gira caindo), Ángeles Dorrio (O cativo) e La pelvis (Psicomuiñeira) aos que se engade o tema “Pouco talento” cantado en galego por Santiago Auserón. Dous centos de copias físicas do disco repartiranse este sábado no concerto de inauguración da Biblioteca Municipal dos Rosais na Coruña. No cartaz do disco Auserón comenta, dos que foron os seus alumnos no obradoiro, que “rebordan frescura e á vez sabor; sendo novas, herdan substancia dun medio musical rico en pervivencias folclóricas". Deles di que "pertencen a unha xeración que manexa con soltura o diálogo entre o acento local e os aires internacionais. Deseñan un interesante panorama de estilos en evolución, que todos os afeccionados e os profesionais das linguas irmás deberiamos seguir con atención.”
MeGA xa ten un lugar de seu en MySpace
Xénero: | 24 / 9 / 2009
A canle de información musical do portal Culturagalega.org ven de abrir un perfil de seu na rede social MySpace, a ferramenta máis usada actualmente polos músicos e bandas en Internet. MeGA “Música en Galicia” aproveitará desde agora todos os fluxos de comunicación que permite esta popular rede para representar ao sector musical do país e dar maior presenza e relevancia a todas as súas actividades e noticias. Desde o seu perfil aberto a todas as colaboracións MeGA ofrecerá unha porta de entrada no MySpace especializada sobre a presenza galega nesta rede social. Vídeos, música, información das novidades, concertos e convocatorias así como comentarios e intercambio de opinións sobre a música en Galicia aparecerán neste perfil . Máis de 50 grupos, artistas ou axentes do sector musical xa conforman a lista de amigos de MeGA. Despois de abrir unha canle en Twitter esta é a segunda extensión que o portal Culturagalega.org presenta sobre unha rede social sacando así parte da súa actividade de difusión cultural da súa propia cabeceira editorial.