Arredor da conformación do Reino de Galicia (711-910) Escritor/a: Xosé Antonio López Teixeira

Ed. Toxosoutos,
2003 | Ensaio e Investigación

Se ben que unha análise que pretenda determinar as orixes do reino galaico debería remontarse ao período suevo, a conformación do medieval Reino de Galiza atopa os seus máis sólidos alicerces ao longo dunha xeira histórica situada entre os anos 711 e 910. Trátase dun tempo que ben podemos denominar "galaico-astur" toda vez que se, dunha banda, a corte dese primeiro núcleo da resistencia cristiá -trala invasión musulmana de comezos do século VIII- aparece, con frecuencia, dentro do actual territorio asturiano, non cabe dúbida, sen embargo, que vai ser Galicia -a Galicia lucense e tamén a Galicia bracarense- o espacio fundamental, e decisivo, para a conformación política do Christianorum Regnum dos "galegos".
Durante os últimos anos estamos a asistir a un verdadeiro rexurdir da historia política. E cómprelle este novo abrollar unha vez que comprobamos que, en boa media, a historia da Idade Media vén determinada pola historia das grandes familias que a protagonizaron. Deste xeito, as figuras de reis, nobres -laicos ou eclesiásticos- adquiren unha nova dimensión. Non se trata de volvermos a aqueles conceptos -caducos- dunha historia de "grandes homes e altos feitos"; sen embargo, recoñecermos cales foron os protagonistas concretos de cada momento non é un ha tarefa trivial e/ou innecesaria; efectivamente, en momentos nos que o poder se concentra en mans concretas, faise necesario coñecer os nomes propios desas mans, analizar as relacións que se establecen entre as diferentes liñaxes e, á súa vez, entre esas liñaxes e a posesión da terra e máis a capacidade de expansión territorial da monarquía. Desta maneira, a historia política entronca coa historia social, económica e cultural, abrindo unha perspectiva plural que nos permita acadar unha imaxe máis completa do noso pasado. Á súa vez, o pasado nunca morre: tan só na súa análise -Ionxe de mitificacións estériles- pode dar paso a unha mellor comprensión do propio presente e aínda a tracexarmos o futuro da nosa nación.
[texto contracapa]

» Título: Arredor da conformación do Reino de Galicia (711-910)
» Escritor/a:
   Xosé Antonio López Teixeira

» Ed. Toxosoutos,
» Ano: 2003
» Xénero: Ensaio e Investigación
» IBIC: DNF - Ensaios literarios
» Coleccion: Trivium
» Pax: 155
» ISBN: 84-95622-78-5

» Crítica: Aproximación arriscada